ஊரக வேலைவாய்ப்பு திட்டம்: பெயா்கள் நீக்கப்படுவதற்கு மாநில அரசே பொறுப்பு: மக்களவையில் அமைச்சா் தகவல்

புது தில்லி: மகாத்மா காந்தி தேசிய ஊரக வேலைவாய்ப்பு உறுதித் திட்டத்திலிருந்து பெயா்கள் நீக்கப்படுவதற்கு மாநில அரசுகளே பொறுப்பு என்று மத்திய ஊரக மேம்பாட்டுத் துறை அமைச்சா் சந்திரசேகா் தெரிவித்தாா்.

கடந்த 4 ஆண்டுகளில் 10.43 லட்சம் ஊரக வேலைவாய்ப்புத் திட்ட ஊழியா்களின் பெயா்கள் பட்டியலில் இருந்து நீக்கப்பட்டுள்ளதாக மக்களவையில் காங்கிரஸ் எம்.பி. கே.சி.வேணுகோபால் செவ்வாய்க்கிழமை குற்றஞ்சாட்டிப் பேசினாா். இதற்கு பதிலளித்த அமைச்சா் சந்திரசேகா், ‘ஊரக மேம்பாட்டுக்கு மத்திய அரசு ஒதுக்கும் நிதியில் 57 சதவீதம் தேசிய ஊரக வேலைவாய்ப்புத் திட்டத்துக்குதான் வழங்கப்படுகிறது.

இத்திட்டம் அமல்படுத்துவதில் வெளிப்படைத்தன்மை வேண்டும் என்பதால் இதில் பணியாற்ற பதிவு செய்யப்பட்ட நபா்களின் ஆதாா் எண் திட்டத்தில் இணைக்கப்படுகிறது. 90 சதவீதம் போ் ஆதாா் எண்ணை இணைத்துள்ளனா். திட்டம் சிறப்பாக நடைபெறுவதை இது உறுதி செய்கிறது.

ஆண்டுதோறும் சராசரியாக 60 லட்சம் பேருக்கு இத்திட்டத்தின் மூலம் புதிதாக வேலைவாய்ப்பு வழங்கப்பட்டு வருகிறது. ஒரு நபா் பல இடத்தில் வேலைவாய்ப்புத் திட்டத்தில் பதிவு செய்வது, இல்லாத நபா்களுக்கு வேலைவாய்ப்பு வழங்குவதாக பதிவு செய்வது, இத்திட்டத்தில் இணைந்த நபா் வேறு கிராமத்துக்கு குடிபெயா்வது, பயனாளரின் உயிரிழப்பு, இத்திட்டத்தில் இருந்து விலக முடிவு செய்வது போன்ற காரணங்களுக்காக வேலைவாய்ப்பு பதிவு அட்டைகள் ரத்து செய்யப்படுகின்றன.

மேலும், அட்டையை ரத்து செய்யும் பொறுப்பு மாநில அரசுகளிடம்தான் உள்ளது. மத்திய அரசிடம் இல்லை. ஊரக வேலைவாய்ப்பு உறுதித் திட்டத்தில் 13 கோடி முதல் 14 கோடி பேருக்கு இதுவரை பணி அட்டை வழங்கப்பட்டுள்ளது. இதில் 9.2 கோடி போ் இப்போதும் தொடா்ந்து வேலைவாய்ப்பு பெற்று பயனடைந்து வருகின்றனா் என்றாா்.