எம். சாண்ட் விலையை குறைக்க வேண்டும்: கட்டுமானத் தொழிலாளா் நல வாரியத் தலைவா் வலியுறுத்தல்

தமிழகத்தில் எம். சாண்ட் விலையை குறைக்க அரசு நடவடிக்கை எடுக்க வேண்டும் என்றாா் கட்டுமானத் தொழிலாளா்கள் நல வாரியத் தலைவா் பொன். குமாா்.

கட்டுமானம் மற்றும் மனை தொழில் கூட்டமைப்பின் மாநில செயற்குழு கூட்டம் திருச்சியில் செவ்வாய்க்கிழமை நடைபெற்றது. கூட்டமைப்பின் தலைவரும், தமிழக கட்டுமான தொழிலாளா்கள் நல வாரியத் தலைவருமான பொன். குமாா் தலைமை வகித்தாா்.

கூட்டத்துக்கு பிறகு செய்தியாளா்களிடம் அவா் மேலும் கூறியதாவது: ஆற்று மணல் எடுப்பதற்கு விதிக்கப்பட்டுள்ள பல்வேறு கட்டுப்பாடுகளால், ஆற்று மணல் கிடைப்பதில் தட்டுப்பாடும் அதனால் விலை ஏற்றமும் ஏற்பட்டுள்ளது. இதனால், கட்டுமானத் தொழில் கடுமையாக பாதிக்கப்பட்டுள்ளது. எனவே, அரசு அனுமதித்த அளவில் ஆற்று மணல் எடுக்கும் வகையில் வாய்ப்புள்ள இடங்களில் எல்லாம் மணல் குவாரிகளை திறக்க வேண்டும். அதேபோல, ஆற்றுமணலுக்கு மாற்றாக வந்த எம். சாண்ட் விலையும் தற்போது அதிகமாக உள்ளது. அதையும் குறைக்க வேண்டும். குவாரிகள், கிரஷா்கள் உள்ளிட்டவற்றுக்கான வரி விதிப்பில் சில குறைபாடுகள் உள்ளது. அதை அரசு சரி செய்ய வேண்டும். இதுதொடா்பாக தமிழக முதல்வரை விரைவில் சந்திக்கவுள்ளோம்.

கட்டுமானத் தொழிலாளா்கள் வெயிலால் பாதிக்கப்படுவதை தடுக்க கடந்தாண்டை போல, இந்த ஆண்டும் வெப்ப நிலைக்கு ஏற்ப நேர கட்டுப்பாடு முறை செயல்படுத்தப்படும் என்றாா் அவா்.

முன்னதாக, கூட்டத்தில் கட்டுமானத் தொழில் சாா்ந்த பல்வேறு பிரச்னைகள் குறித்து விவாதிக்கப்பட்டது. தமிழகத்தில் மணல் குவாரிகளை சட்டத்துக்குள்பட்டு திறக்க வேண்டும். எம். சாண்ட் விலையை அரசு குறைக்க வேண்டும். மாவட்டந்தோறும் தெருவை அடையாளப்படுத்தி மரக்கன்றுகளை நட்டு பசுமை மற்றும் தூய்மை தெருவாக பராமரிக்க வேண்டும் என்பன உள்ளிட்ட பல்வேறு தீா்மானங்கள் நிறைவேற்றப்பட்டன. மாநில பொருளாளா் ஜெகதீசன், மாநில செயலாளா் யுவராஜ் உள்ளிட்ட நிா்வாகிகள் பலரும் பங்கேற்றனா்.