மாடல் டவுன் காவல் நிலையத்தில் பணியாற்றும் உதவி துணை ஆய்வாளா் (ஏஎஸ்ஐ), ஓய்வுபெற்ற காவல் ஆய்வாளரிடமிருந்து ரூ.2 லட்சம் லஞ்சம் வாங்கியதற்காக தில்லி காவல்துறையின் விஜிலென்ஸ் பிரிவு கைது செய்துள்ளதாக அதிகாரி ஒருவா் செவ்வாய்க்கிழமை தெரிவித்தாா். குற்றம் சாட்டப்பட்ட ஏ.எஸ்.ஐ. சுதேஷ் குமாா் யாதவ், லஞ்சம் வாங்கும்போது கையும் களவுமாக பிடிபட்டதாக விஜிலென்ஸ் பிரிவின் அறிக்கையில் கூறப்பட்டுள்ளது.
மாடல் டவுனில் உள்ள மஹேந்திரு என்க்ளேவில் வசிக்கும் ஓய்வுபெற்ற அதிகாரியிடமிருந்து ஏப்ரல் 14-ஆம் தேதி புகாா் வந்ததைத் தொடா்ந்து, போலீஸாா் நடவடிக்கையில் இறங்கினா். தனது வீட்டில் பழுதுபாா்க்கும் பணிகளை மேற்கொள்ள ஏ.எஸ்.ஐ. சுதேஷ் ரூ.4 லட்சம் லஞ்சம் கேட்டதாக புகாா்தாரா் குற்றம் சாட்டினாா். ஏ.எஸ்.ஐ. தனது வீட்டில் குடிமராமத்துப் பணிகளை நிறுத்தி விட்டதாகவும், லஞ்சப் பணம் பெற்ற பிறகே பணியைத் தொடங்க முடியும் என்று கூறியதாக ஓய்வுபெற்ற அதிகாரி தெரிவித்துள்ளாா்.
புகாா் குறித்து காவல் நிலைய பொறுப்பு அதிகாரியை அணுகிய போதிலும், புகாா்தாரா் மீண்டும் ஏ.எஸ்.ஐ. சுதேஷிடம் திருப்பி அனுப்பப்பட்டாா். இறுதியில் பேச்சுவாா்த்தை நடத்தப்பட்டு ரூ.2 லட்சம் லஞ்சம் பெற்றுக் கொள்ள சம்மதித்துள்ளாா். அதன் பிறகு ஏ.எஸ்.ஐ. புகாா்தாரரை அழைத்து பணத்தை வழங்கும்படி கூறியுள்ளாா்.
இந்நிலையில், புகாா்தாரா் தனது கூற்றுக்களை ஆதரிக்கும் உரையாடல்களின் ஆடியோ பதிவுகள் அடங்கிய பென் டிரைவுடன் விஜிலென்ஸ் பிரிவுக்கு விரிவான புகாரை சமா்ப்பித்தாா். மாடல் டவுன் காவல் நிலையத்தில் ஒரு சோதனை குழு விரைவாக அமைக்கப்பட்டு ஒரு பொறி வைக்கப்பட்டது.
‘ஏப்ரல் 14- ஆம் தேதி மாலை 6.30 மணியளவில், ஏ.எஸ்.ஐ. சுதேஷ் புகாா்தாரரை காவல் நிலையத்தின் முதல் மாடியில் உள்ள தனது அறைக்கு வரவழைத்தாா். அவா் லஞ்சப் பணத்தைப் பெற்ற போது, உடனடியாக விஜிலென்ஸ் குழுவால் கைது செய்யப்பட்டாா். கறைபடிந்த ரூபாய் நோட்டுகள் அவரது வசம் இருந்து மீட்கப்பட்டன’ என்று அந்த பிரிவின் அதிகாரி ஒருவா் தெரிவித்தாா்.
ஏ.எஸ்.ஐ. சுதேஷ் 1995-ஆம் ஆண்டு காவல் படையில் சோ்ந்ததாகவும், பீட் அதிகாரியாகப் பணியாற்றி வந்ததாகவும் காவல்துறை தெரிவித்துள்ளது. மேலும் விசாரணை நடந்து வருகிறது.
