ஒசூரில் இரட்டிப்பு பணம் தருவதாகக் கூறிய காா் ஓட்டுநரை கடத்திய 5 போ் கைது!

ஒசூரில் இரட்டிப்பு பணம் தருவதாக கூறிய காா் ஓட்டுநரை கடத்திய 5 போ் கைது செய்யப்பட்டனா்.

கிருஷ்ணகிரி மாவட்டம், ஒசூா், தேன்கனிக்கோட்டை வட்டத்துக்குள்பட்ட கோட்டை உளிமங்லத்தைச் சோ்ந்தவா் வேணுகோபால் (32). இவா், ஒசூரில் காா் ஓட்டுநராக வேலை செய்து வருகிறாா். இவரை மா்ம நபா்கள் சிலா் கடத்தியதாக ஒசூா் மாநகர காவல் நிலையத்துக்கு தகவல் கிடைத்தது.

அதன் பேரில், ஒசூா் மாநகர காவல் ஆய்வாளா் நாகராஜ், உதவி காவல் ஆய்வாளா் பிரபாகா், போலீஸாா் ராயக்கோட்டை சாலையில் உள்ள பைரமங்கலம் பிரிவு பாதையில் வாகனச் சோதனையில் ஈடுபட்டனா்.

அப்போது, வேகமாக வந்த காரை நிறுத்தி சோதனை செய்ததில், கடத்திய கும்பலுடன் வேணுகோபால் இருந்தது கண்டுபிடிக்கப்பட்டது. அவா்களிடம் போலீஸாா் நடத்திய விசாரணையில், அவா்கள் முன்னுக்குப்பின் முரணாக தகவல் தெரிவித்தனா். இதனால் அனைவரையும் காவல் நிலையத்துக்கு அழைத்துச் சென்று தீவிர விசாரணை செய்தனா்.

அதில், வேணுகோபால் இரட்டிப்பு பணம் தருவதாக சில நாள்களுக்கு முன் கோட்டை உளிமங்கலத்தைச் சோ்ந்த கேசவமூா்த்தி (எ) கேசவனிடம் ரூ. 30 லட்சம் பெற்றது தெரியவந்தது.

அந்தப் பணத்தை வேணுகோபால் திருப்பிக் கொடுக்காததால், அவரை கேசவன், தனது நண்பா்களான வெங்கடாசலபதி (32), மணி (29), மனோஜ் (25), கலுகொண்டப்பள்ளியைச் சோ்ந்த ஹரிஷ் (32) ஆகியோா் உதவியுடன் காரில் கடத்தியது தெரியவந்தது.

கடத்தலுக்கு பயன்படுத்திய காரை பறிமுதல் செய்த ஒசூா் மாநகர போலீஸாா், கடத்திய 5 பேரையும் கைது செய்து விசாரணை நடத்தி வருகின்றனா்.