ஒற்றுமையின் முகம்: இந்து பெண்ணை பஞ்சாயத்து தலைவராக தோ்வு செய்த இஸ்லாமியா்கள்

நமது சிறப்பு நிருபா்

தில்லி, குருகிராம் அருகே இஸ்லாமியா்கள் அதிகமாக வசிக்கும் ஒரு கிராமத்தில் அங்குள்ள ஒரே இந்து பஞ்சாயத்து உறுப்பினரை பஞ்சாயித்து தலைவராக (சா்பஞ்ச்) தோ்ந்தெடுத்து ஒற்றுமையை வெளிப்படுத்தியுள்ளனா்.

குருகிராம் (ஹரியாணா) அருகேயுள்ள நுஹ் மாவட்டத்தில் உள்ள சிரோலி கிராமத்தில் இஸ்லாமியா்கள் பெரும்பாலானவா்களாக உள்ளனா். இந்த பஞ்சாயத்தில் இந்து மதத்தைச் சோ்ந்த ஒரே ஒருவா் பஞ்சாயத்து உறுப்பினராக இருந்தாா். முப்பது வயதான நிஷா சௌகான் பெரும்பான்மை இஸ்லாமிய உறுப்பினா்களால் சிரோலி பஞ்சாயத்து தலைவராக கடந்த ஏப்ரல் 2 ஆம் தேதி தோ்ந்தெடுத்தனா். இந்த தகவல் அரசு அதிகாரிகள் மத்தியில் வியப்பை ஏற்படுத்தி இந்த கிராம மக்களை பாராட்டியுள்ளனா்.

இது குறித்து பஞ்சாயத்து அதிகாரிகள் வட்டாரங்களில் கூறப்பட்டது வருமாறு: குருகிராமம் அருகேயுள்ள புனஹானா சட்டப்பேரவைத் தொகுதியின் கீழ் உள்ள சிரோலி பஞ்சாயத்தில் 15 உறுப்பினா்கள் உள்ளனா். இந்த கிராமத்தில் மொத்தமுள்ள 3,296 வாக்காளா்களில் 250 போ் மட்டுமே இந்துக்கள். இதில் 8 மகளிா் உள்ளிட்ட 14 போ் இஸ்லாமியா்களாக தோ்வு செய்யப்பட்டனா். ஒரு இந்து உறுப்பினா் தோ்வானாா். சிரோலி பஞ்சாயத்து பதவி மகளிருக்காக ஒதுக்கப்பட்டுள்ளது. இதில் சஹானா என்ற வேட்பாளா் தோ்வு செய்யப்பட்டு பின்னா் அவரது கல்விச் சான்றிதழ்கள் போலியானவை என்று கண்டறியப்பட்டு பதவி நீக்கம் செய்யப்பட்டாா். இதன்பின்னா் நடைபெற்ற தோ்தலில் நிஷா சௌகானை தோ்வு செய்தனா்‘ என்றாா் அந்த அதிகாரி.

புதிதாக தோ்ந்தெடுக்கப்பட்ட பஞ்சாயத்து தலைவா் நிஷா செய்தியாளா்களிடம் கூறுகையில், தனது வெற்றி இந்து-முஸ்லிம் ஒற்றுமையின் சின்னம். எங்கள் கிராமம் இஸ்லாமியா்கள் ஆதிக்கம் கொண்ட கிராமம். ஆனால் இங்கு இந்து-முஸ்லிம் சகோதரத்துவத்தின் பழைய பாரம்பரியம் இன்னும் உள்ளது. குறிப்பாக இங்குள்ள மேவாட் பகுதியில் எந்த மத பாகுபாடும் கிடையாது. இங்கு நான் சா்பஞ்சாக தோ்ந்தெடுக்கப்பட்டதும் ஒரு உதாரணம். எனது வெற்றி இப்பகுதியின் வகுப்புவாத சகோதரத்துவத்திற்கான செய்தியாக உள்ளது‘ என நிஷா சௌகான் தெரிவித்தாா்.

முன்னாள் சிரோலி சா்பஞ்சும் தற்போதைய வாா்டு உறுப்பினருமான அஷ்ரஃப், ‘சிறந்த நிா்வாகத்திற்கான நம்பிக்கையில் இந்த பஞ்சாயத்து நிஷாவைத் தோ்வு செய்தது‘ என்றாா்.

‘இங்கு இந்துக்களும் இஸ்லாமியா்களும் நல்லிணக்கத்தில் உள்ளனா். நாங்கள் ஒருவருக்கொருவா் மகிழ்ச்சியிலும் துக்கத்திலும் முழுமையாக பங்கேற்கிறோம்‘ என்றும் கூறுகிறாா் அஷ்ரஃப்.