`கட்சி தாவமாட்டோம்.. சொன்னபடி கேட்போம்!' - புதிய எம்.எல்.ஏ-க்களிடம் உத்தரவாதம் எழுதி வாங்கிய தாக்கரே

மகாராஷ்டிரா சட்டமன்றத் தேர்தலில் எதிர்க்கட்சிகளின் மகாவிகாஷ் அகாடி படுதோல்வியை சந்தித்தது. சிவசேனா மற்றும் தேசியவாத காங்கிரஸ் கட்சிகள் கடந்த 2022, 23ம் ஆண்டில் இரண்டாக உடைந்த பிறகு முதல் முறையாக சந்தித்த இத்தேர்தலில் உத்தவ் தாக்கரே மற்றும் சரத் பவார் கட்சிகள் சந்தித்த தோல்வி அதிர்ச்சியில் இருந்து அக்கட்சிகள் இன்னும் மீள வில்லை. தற்போது நடந்த தேர்தலில் வெற்றி பெற்ற சொற்ப எம்.எல்.ஏ.க்களும் அணி மாறிவிடுவார்களோ என்ற அச்சம் உத்தவ் தாக்கரேயிக்கு எழுந்துள்ளது. எனவே அவர்கள் 20 பேரையும் தனது வீட்டிற்கு வரவைத்த உத்தவ் தாக்கரே அவர்களுடன் ஆலோசனை நடத்தினார். இந்த ஆலோசனைக் கூட்டத்திற்கு பிறகு அனைத்து எம்.எல்.ஏ.க்களிடமும் உத்தவரவாத கடிதம் ஒன்றை உத்தவ் தாக்கரே எழுதி வாங்கி இருக்கிறார்.

அக்கடிதத்தில் தொடர்ந்து கட்சிக்கு விசுவாசமாக இருப்பேன் என்றும், வேறு கட்சிக்கு செல்லமாட்டேன் என்றும் அக்கடிதத்தில் எழுதப்பட்டுள்ளது. அதோடு கட்சி எடுக்கும் முடிவுக்கும், கட்சியின் தலைவர் உத்தவ் தாக்கரே எடுக்கும் கொள்கை முடிவுகளுக்கு கட்டுப்பட்டு நடப்போம் என்றும் அதில் குறிப்பிடப்பட்டுள்ளது. உத்தவ் தாக்கரே கட்சி சார்பாக தேர்ந்தெடுக்கப்பட்டுள்ள எம்.எல்.ஏ.க்கள் விரைவில் எங்களது கட்சியில் சேருவார்கள் என்று ஏக்நாத் ஷிண்டே ஆதரவாளர்கள் தெரிவித்துள்ளனர். இக்கூட்டத்தில் கொங்கன் பகுதியில் இருந்து தேர்ந்தெடுக்கப்பட்ட பாஸ்கர் ஜாதவ் கட்சியின் சட்டமன்ற கட்சி தலைவராக தேர்ந்தெடுக்கப்பட்டார்.

இப்பதவி தனக்கு ஆச்சரியத்தை ஏற்படுத்துவதாக குறிப்பிட்டார். கொங்கன் பகுதியில் சிவசேனா ஆதிக்கம் செலுத்தி வந்தது. ஆனால் இத்தேர்தலில் உத்தவ் தாக்கரே தலைமையிலான சிவசேனா ஒரு தொகுதியில் மட்டுமே வெற்றி பெற்றுள்ளது. ஆதித்ய தாக்கரே சட்டமன்றப் பேரவை கட்சி தலைவராக தேர்ந்தெடுக்கப்பட்டார். சட்டமன்றத்தில் எதிர்க்கட்சி தலைவர் பதவியை கோர உத்தவ் தாக்கரே கட்சிக்கு போதிய எம்.எல்.ஏ.க்கள் இல்லை. 28 எம்.எல்.ஏ.க்கள் இருந்தால் மட்டுமே எதிர்க்கட்சி தலைவர் பதவிக்கு உரிமை கோர முடியும். ஆனால் 20 எம்.எல்.ஏ.க்கள் இருந்தபோதிலும் தங்களுக்கு எதிர்க்கட்சி தலைவர் பதவியை கொடுக்கும்படி கேட்போம் என்று பாஸ்கர் ஜாதவ் தெரிவித்துள்ளார்.

2022ம் ஆண்டு சிவசேனா உடைந்து அதிகப்படியான எம்.எல்.ஏ.க்கள் ஏக்நாத் ஷிண்டே அணிக்கு சென்றுவிட்டனர். அதனால் உத்தவ் தாக்கரேயின் கட்சி சின்னம் ஏக்நாத் ஷிண்டேயிடம் பறிபோய்விட்டது. சரத் பவாருக்கும் இதேநிலை தான் ஏற்பட்டுள்ளது.