கரூா் மாவட்டத்தில் கோயில் நிலங்கள் முழுமையாக மீட்கப்படும்: திருத்தொண்டா் சபை நிறுவனா் தகவல்

கரூா்: கரூா் மாவட்டத்தில் கோயில் நிலங்கள் குண்டுமணி இடம் கூட விடாமல் மீட்கப்படும் என்றாா் திருத்தொண்டா் சபை நிறுவனா் ராதாகிருஷ்ணன்.

திருத்தொண்டா் சபை அறக்கட்டளை நிறுவனா் ராதாகிருஷ்ணன் கரூா் கல்யாண பசுபதீசுவரா் கோயிலுக்கு சுவாமி தரிசனம் செய்ய திங்கள்கிழமை காலை வந்தாா். அப்போது அவா் செய்தியாளா்களிடம் மேலும் கூறியது:

தமிழகம் முழுவதும் கோயில்களுக்குச் சொந்தமாக 5 லட்சம் ஏக்கா் நிலம் இருப்பதாக ஏற்கெனவே சட்டப்பேரவையில் அறிவிக்கப்பட்டிருக்கிறது. ஆனால், தற்போது 4.78 லட்சம் ஏக்கா் இருப்பதாக சொல்கிறாா்கள். மீதமுள்ள நிலங்கள் என்ன ஆனது என்று முழுமையாக தெரிவிக்கப்படவில்லை. நீதிமன்றத்தில் வழக்கு தொடா்ந்த நிலையில் அந்த உத்தரவின் அடிப்படையில் பெயரளவில் அரசு சாா்பில் கண் துடைப்புக்காக ஆய்வுக் கூட்டங்கள் நடத்தப்படுகின்றன. சரியான ஒப்பீட்டு அளவினை அரசு வெளியிடாமல் தயங்கி வருகிறது.

கரூா் மாநகராட்சி பகுதியில் அரசியல் தலையீடுகள் கடந்த ஆட்சியிலும் இல்லை. இந்த ஆட்சியிலும் இல்லை. ஆனால், இங்கு இருக்கக் கூடிய ஓய்வுபெற்ற ஒருசில அலுவலா்களின் தலையீட்டால், கோயில் நிலங்களை மீட்பதில் வெற்றி அடைய முடியாத நிலையில், ஆக்கிரமிப்பு செய்த மனுதாரா்களின் சீராய்வு மனுவும் உயா்நீதிமன்ற மதுரை கிளையில் தள்ளுபடி செய்யப்பட்டு விட்டது. கோயில் நிலங்களை ஆக்கிரமித்துள்ளவா்கள் வாடகைதாரா்களாக வரும்பட்சத்தில் தொடா்ந்து குடியிருப்பதற்கு ஒரு வாய்ப்பு ஏற்படும். அதையும் மீறி குற்ற அலுவலா்களுடன் சோ்ந்தால் எந்தவித பாகுபாடும் இல்லாமல் நடவடிக்கைகள் எடுக்கப்படும். கரூா் மாவட்டத்தில் நிச்சயமாக ஒரு குண்டுமணி இடம் கூட விடாமல் மீட்கப்படும். அரசு அலுவலா்கள் ஆக்கிரமிப்பு செய்திருந்தால் அவா்கள் மீதும் துறை ரீதியான நடவடிக்கைகள் எடுப்பதுடன், குற்றவழக்குகளும் மேற்கொள்ளப்படும் என்றாா் அவா்.