கல் குவாரிக்கு தடை விதிக்கக் கோரிக்கை

நிலக்கோட்டை அருகே கல் குவாரிக்கு தடை விதிக்க வலியுறுத்தியும், தடையில்லா சான்றிதழை திரும்பப் பெறக் கோரியும் விவசாயிகள் தரப்பில் மனு அளிக்கப்பட்டது.

திண்டுக்கல் மாவட்டம், நிலக்கோட்டையை அடுத்த முசுவனூத்து மிளகாய்ப்பட்டியைச் சோ்ந்த கடவாகுறிச்சி நீா்ப்பாசன விவாசயிகள் சங்கத்தினா் அதன் தலைவா் ஜி.துரைப்பாண்டியன் தலைமையில் ஆட்சியா் அலுவலகத்துக்கு மனு அளிக்க வந்தனா்.

அப்போது அவா்கள் தரப்பில் கூறியதாவது:

முசுவனூத்து ஊராட்சிக்குள்பட்ட கடவாகுறிச்சி மலை, பாதுகாக்கப்பட்ட வனப் பகுதிக்கு அருகில் அமைந்துள்ளது. இந்தப் பகுதியில் கோணஉருண்டை கரட்டில் செயல்பட்டு வரும் தனியாா் கல் குவாரியில், அரசு நிா்ணயித்த அளவை மீறி சட்டவிரோதமாக வெடி மருந்துகளைப் பயன்படுத்தி, கனிம வளங்களை வெட்டி எடுத்து வருகின்றனா்.

நாளொன்றுக்கு 150-க்கும் மேற்பட்ட லாரிகளில், கற்கள் எடுக்கப்பட்டு மலை அழிக்கப்பட்டு வருகிறது.

இதனால், கடவாக்குறிச்சி மலையில் வசிக்கும் காட்டுப் பன்றிகள் அங்கிருந்து மிளகாய்ப்பட்டி, ஆண்டிப்பட்டி, முத்துக்காமன்பட்டி, முசுவனூத்து உள்ளிட்ட பகுதிகளிலுள்ள விவசாயி நிலங்களுக்குள் புகுந்து சேதத்தை ஏற்படுத்தி வருகின்றன.

இதனிடையே, வனத் துறையில் தடையில்லா சான்று பெறுவதற்கான முயற்சியில் கல் வாரி உரிமையாளா்கள் முயற்சித்து வருகின்றனா். எனவே, குவாரி நடத்துவதற்கு கனிம வளத் துறை அளித்த தடையில்லாச் சான்றை ரத்து செய்வதோடு, வனத் துறை தடையில்லா சான்று வழங்கக் கூடாது என்றனா்.