காஞ்சிபுரம் புற்றுநோய் ஆராய்ச்சி மையம்: 394 மருத்துவப் பணியிடங்கள் உருவாக்கம்

காஞ்சிபுரம் அறிஞா் அண்ணா புற்றுநோய் ஆராய்ச்சி நிறுவனம் 750 படுக்கைகளுடன் கூடிய ஒப்புயா்வு மையமாக தரம் உயா்த்தப்பட்ட நிலையில், 394 மருத்துவப் பணியிடங்கள் புதிதாக உருவாக்கப்பட்டுள்ளன.

அதற்கான நிதி ஒதுக்கீட்டு அரசாணையை மக்கள் நல்வாழ்வுத் துறை வியாழக்கிழமை பிறப்பித்துள்ளது.

அதன்படி, அதிநவீன வசதி கொண்ட ஒப்புயா்வு மையம், 6,36,347 சதுர அடி பரப்பளவில் தரைத் தளம் மற்றும் 5 தளங்களுடன் ரூ.250.46 கோடியில் அமைக்கப்பட்டு வருகிறது.

அதில், ரத்தவியல், குழந்தை புற்றுநோயியல், புற்றுநோய் தடுப்பு மற்றும் சமூக புற்றுநோயியல், மாநில புற்றுநோய் பதிவு, வலி நிவாரண சிகிச்சை அல்லது நல்வாழ்வு பராமரிப்பு சேவைகளுடன் கூடுதலாக மனநல மருத்துவப் பிரிவு, காது, மூக்கு, தொண்டை மருத்துவப் பிரிவு, பல் அறுவை சிகிச்சை பிரிவு, நரம்பியல் அறுவை சிகிச்சை பிரிவு, ரத்த மாற்ற மருத்துவப் பிரிவு, எலும்பியல் பிரிவு ஆகிய துறைகளும் செயல்பட உள்ளன.

இதற்காக, 49 மருத்துவ அலுவலா்கள், 2 மருத்துவம் சாராத பணியாளா்கள், 207 செவிலியா் பணியாளா்கள், 7 அமைச்சுப் பணியாளா்கள், 129 துணை மருத்துவப் பணியாளா்கள் உள்பட 394 பணியிடங்கள் புதிதாக உருவாக்கப்படுகின்றன.

மேலும், சுகாதாரப் பணியாளா்கள், மருத்துவமனை ஊழியா்கள் என 163 இடங்கள் உருவாக்கப்பட உள்ளன. இதற்கான நிதி ஒதுக்கீட்டுக்கும் ஒப்புதல் பெறப்பட்டு அரசாணை பிறப்பிக்கப்பட்டுள்ளது.