ஃபென்ஜால் புயலால் பாதித்த விவசாயிகளுக்கு அறிவித்த நிவாரணத்தை புதுவை முதல்வா் வழங்கினாா்.
2024-ஆம் ஆண்டு இறுதியில் ஃபென்ஜால் புயல் வீசியதாலும், மழையாலும் ஏற்பட்ட பாதிப்பை கருத்தில்கொண்டு, புதுச்சேரி, காரைக்கால் பகுதி விவசாயிகளுக்கு ஹெக்டேருக்கு ரூ.30 ஆயிரம் நிவாரணம் வழங்கப்படும் என புதுவை முதல்வா் என். ரங்கசாமி அறிவித்தாா். இதற்கு துணை நிலை ஆளுநரின் ஒப்புதல் கிடைத்தது.
காரைக்கால் பகுதியைச் சோ்ந்த 5,020 விவசாயிகளுக்கு ரூ.11. 64 கோடி நிவாரணத் தொகையை காா்னிவல் தொடக்க நிகழ்வில் வியாழக்கிழமை கலந்துகொண்ட முதல்வா் என். ரங்கசாமி அதற்கான காசோலையை வழங்கினாா். நிகழ்வில், சட்டப்பேரவைத் தலைவா் ஆா். செல்வம், வேளாண் அமைச்சா் தேனி சி. ஜெயக்குமாா், குடிமைப் பொருள் வழங்கல் துறை அமைச்சா் பி.ஆா்.என். திருமுருகன் உள்ளிட்டோா் பங்கேற்றனா்.
விவசாயிகளுக்கான நிவாரணத் தொகை அடுத்த சில நாள்களில் அவரவா் வங்கிக் கணக்கில் சோ்க்கப்படும் என வேளாண் துறையினா் தெரிவித்தனா்.
