குட்டு வைத்த டிராய்: வெறும் அழைப்புகள், எஸ்எம்எஸ்-க்கு ரீசார்ஜ் திட்டங்கள்

இணையவசதி அல்லாமல், வெறும் அழைப்பு மற்றும் எஸ்எம்எஸ் சேவையை மட்டும் பெறும் வகையில் ரீசார்ஜ் திட்டங்களை மீண்டும் கொண்டு வர வேண்டும் என்று டிராய் பரிந்துரை செய்திருக்கிறது.

தொலைத்தொடர்பு நிறுவனங்களுக்கான ஒழுங்குமுறை ஆணையமானது, நாட்டில் உள்ள தனியார் தொலைத்தொடர்பு நிறுவனங்களுக்கு ஒரு புதிய அறிவுறுத்தலை வெளியிட்டிருக்கிறது. அதில், டேட்டா பயன்படுத்தாத வாடிக்கையாளர்களுக்கு என தனியாக வெறும் அழைப்பு மற்றும் எஸ்எம்எஸ் அனுப்பும் வசதிகொண்ட ரீசார்ஜ் திட்டங்களை மீண்டும் கொண்டு வர வேண்டும் என்று தெரிவிக்கப்பட்டுள்ளது.

ரிலையன்ஸ் ஜியோ, வோடஃபோன்-ஐடியா, பாரதி ஏர்டெல் உள்ளிட்ட தனியார் தொலைத்தொடர்பு நிறுவனங்கள், இனி வெறும் அழைப்பு மற்றும் எஸ்எம்எஸ் வசதி கொண்ட வவுச்சர்களை அறிமுகம் செய்ய வேண்டியது உள்ளது. இதனால், அனைத்து ரீசார்ஜ்களிலும் டேட்டா வசதியும் இருப்பதும், டேட்டா பயன்படுத்தும் வசதியில்லாத செல்போனைப் பயன்படுத்துபவர்களும் அதே திட்டத்துக்கு ரீசார்ஜ் செய்வதும் தவிர்க்கப்படும் என்று கூறப்படுகிறது.