கும்பகோணத்தில் ‘போக்ஸோ’ வழக்கில் கைதான பேராசிரியரிடம் தேசிய புலனாய்வு (என்ஐஏ) அமைப்பினா் விசாரித்து வருகின்றனா்.
புதுக்கோட்டை மாவட்டம், கோட்டைப்பட்டினத்தைச் சோ்ந்தவா் ஜியாவுதீன் பாகவி (42). இவா், கும்பகோணம் வட்டம் கோவிலாச்சேரியில் உள்ள தனியாா் கல்லூரியில் அரபி பேராசிரியராகப் பணியாற்றி வந்தாா்.
அந்தக் கல்லூரியைச் சோ்ந்த ஒரு மாணவிக்கு, ஜியாவுதீன் பாகவி தொடா்ந்து பாலியல் தொல்லை கொடுத்ததாக டிச. 25-ஆம் தேதி ஆடுதுறை அனைத்து மகளிா் போலீஸாா் ‘போக்ஸோ’ சட்டத்தின் கீழ் வழக்குப் பதிந்து, அவரைக் கைது செய்து, திருச்சி மத்திய சிறையில் அடைத்தனா்.
இந்நிலையில், ஜியாவுதீன் பாகவியை என்ஐஏ அதிகாரிகள் விசாரணைக்காக அழைத்துச் சென்றது தெரியவந்துள்ளது.
இதுகுறித்து போலீஸாா் மேலும் கூறியதாவது: ஐஎஸ்ஐஎஸ் அமைப்புடன் தொடா்புடைய ஹிஸ்புத் தஹ்ரிா் என்ற அமைப்பில் செயல்பட்டு வந்ததாக, ஜியாவுதீன் பாகவியை தேசியப் புலனாய்வு அமைப்பினா் 2022 மாா்ச் 14- ஆம் தேதி கைது செய்தனா். இது தொடா்பான வழக்கு சென்னை பூவிருந்தவல்லியில் உள்ள தேசிய புலனாய்வு அமைப்பு நீதிமன்றத்தில் நடைபெற்று வருகிறது. இந்த வழக்கு தொடா்பாக ஜியாவுதீன் பாகவி மாதந்தோறும் நீதிமன்றத்தில் ஆஜாராகி வந்தாா்.
இதனிடையே, அவா் பாலியல் வழக்கில் கைது செய்யப்பட்டு திருச்சி சிறையில் அடைக்கப்பட்டதால், கடந்த 8-ஆம் தேதி நீதிமன்றத்தில் ஆஜராகவில்லை. இதையடுத்து, திருச்சி சிறையிலிருந்து ஞாயிற்றுக்கிழமை ஜாமீனில் வந்த ஜியாவுதீன் பாகவியை, தேசியப் புலனாய்வு அமைப்பினா் விசாரணைக்காக அழைத்துச் சென்றுள்ளனா்.
