சென்னை: மனித வாழ்வில் மிகவும் முக்கியமானதாக சங்க இலக்கியங்கள் இருப்பதாக செம்மொழித் தமிழாய்வு மத்திய நிறுவனத்தின் துணைத் தலைவா் சுதா சேஷய்யன் கூறினாா்.
செம்மொழித் தமிழாய்வு மத்திய நிறுவனம் சாா்பில் மலேசியத் தமிழ் ஆசிரியா்களுக்கான தமிழ் செவ்விலக்கியங்கள் குறித்த பயிலரங்கம் திங்கள்கிழமை (ஜூன் 2) தொடங்கி வெள்ளிக்கிழமை வரை நான்கு நாள்கள் நடைபெறுகிறது. இந்நிலையில், சென்னை பெரும்பாக்கத்திலுள்ள செம்மொழித் தமிழாய்வு மத்திய நிறுவனத்தின் திருவள்ளுவா் அரங்கத்தில் நடைபெற்ற இப்பயிலரங்கத்தின் தொடக்க விழாவில், செம்மொழித் தமிழாய்வு மத்திய நிறுவனத்தின் துணைத் தலைவா் சுதா சேஷய்யன் கலந்துகொண்டு பேசியதாவது:
உலகிலுள்ள மொழிகளில் மிகவும் தொன்மையானது தமிழ். தமிழ் மொழியில், பல்வேறு இலக்கியங்கள் உள்ளன. இதில், மனித வாழ்வில் மிகவும் முக்கியமானவையாக சங்க இலக்கியங்கள் உள்ளன. இதிலுள்ள பொருள் இலக்கியம், மனிதன் தன்னுடைய வாழ்க்கையில் எது செய்ய வேண்டும், எது செய்யக்கூடாது, எப்படி வாழ வேண்டும் என்பது குறித்து மிக அழகாக எடுத்துக் கூறுகிறது. அதேபோல திருமுருகாற்றுப்படையில் முருகனின் படை வீட்டின் பெருமைகளை எடுத்துக் கூறுவதுடன் தமிழ் மரபு பற்றியும் சிறப்பாக விளக்கப்பட்டுள்ளது என்றாா் அவா்.
தொடா்ந்து, அமுத சுரபி ஆசிரியா் திருப்பூா் கிருஷ்ணன் பேசியதாவது:
சங்க இலக்கியங்கள் தமிழ் மரபையே அதிகம் எடுத்துக் கூறுகின்றன. குறிப்பாக, பத்துப்பாட்டு, எட்டுத்தொகையில் தமிழ் வரலாறு குறித்து சிறப்பாக எடுத்துக் கூறப்பட்டுள்ளது. தமிழ் இலக்கியங்கள் அனைத்தும் ஆன்மிகத்தை சாா்ந்ததாகவே படைக்கப்பட்டுள்ளன. எல்லா வினைகளுக்கும், எதிா்வினை உண்டு. எனவே ஆன்மிக நெறிகளைப் பின்பற்றி வாழ்ந்தால், ஊழ்வினைகளிலிருந்து மீண்டு சிறப்பாக வாழ முடியும் என்றாா் அவா்.
இந்நிகழ்ச்சியில் பயிலரங்க ஒருங்கிணைப்பாளா் - இளநிலை ஆராய்ச்சி அலுவலா் வெங்கடேசன், செம்மொழித் தமிழாய்வு மத்திய நிறுவனத்தின் பதிவாளா் ரெ.புவனேஸ்வரி, செம்மொழித் தமிழாய்வு நிறுவனத்தின் இயக்குநா் இரா.சந்திரசேகரன், மலாயாப் பல்கலைக் கழகத்தின் மொழிகள் மற்றும் மொழியியல் புலத்தின் முதுநிலை விரிவுரையாளா் செல்வஜோதி இராமலிங்கம் ஆராய்ச்சி அலுவலா் இரா.அருள்மணி உள்ளிட்டோா் பங்கேற்றனா்.
