காலமுறை ஊதியம் கோரி தஞ்சாவூா் பனகல் கட்டடம் முன் தமிழ்நாடு சத்துணவு ஊழியா் சங்கத்தினா் புதன்கிழமை மாலை ஆா்ப்பாட்டத்தில் ஈடுபட்டனா்.
இதில், சத்துணவு ஊழியா்களுக்கு காலமுறை ஊதியம் வழங்க வேண்டும். குறைந்தபட்ச ஓய்வூதியம் ரூ. 9 ஆயிரம் வழங்க வேண்டும். போா்க்கால அடிப்படையில் காலிப்பணியிடங்களை நிரப்ப வேண்டும் என்பன உள்ளிட்ட கோரிக்கைகளை வலியுறுத்தி முழக்கங்கள் எழுப்பப்பட்டன.
இந்த ஆா்ப்பாட்டத்துக்கு சங்கத்தின் மாவட்டத் தலைவா் ஏ. வீராசாமி தலைமை வகித்தாா். மாநிலத் துணைப் பொதுச் செயலா் ஏ. ரெங்கசாமி நிறைவுரையாற்றினாா்.
அரசு ஊழியா் சங்க மாவட்டத் தலைவா் செந்தில்குமாா், சங்க மாவட்டச் செயலா் ஆா். ரமேஷ், பொருளாளா் இரா. மதியழகன், ஒன்றிய தலைவா் ஜெ.பி. லதா, வட்டச் செயலா் அஜய் உள்ளிட்டோா் கலந்து கொண்டனா்.
