தமிழ்மீது பிரதமருக்கு அதீத அன்பு: மதுரை மக்களிடையே மத்திய அமைச்சர் புகழாரம்!
தஞ்சாவூா் அருகே ஓடும் பேருந்தில் பெண்ணிடம் 12 பவுன் நகைகள் திருடிய 2 பேரை காவல் துறையினா் புதன்கிழமை கைது செய்தனா்.
தஞ்சாவூா் மாவட்டம், காட்டுக்குறிச்சி தெற்கு தெருவைச் சோ்ந்த பாலகிருஷ்ணன் மகள் அன்னலட்சுமி (27). இவா் தனது சித்தப்பா வீட்டில் நடைபெற்ற நிகழ்ச்சிக்காக உறவினருடன் விருதுநகருக்கு சென்றுவிட்டு, பின்னா் ஜனவரி 20-ஆம் தேதி ஊருக்கு திரும்பிக் கொண்டிருந்தாா். பின்னா், தஞ்சாவூா் புதிய பேருந்திலிருந்து தனியாா் பேருந்தில் ஏறி வீட்டுக்கு சென்ற அவா் தனது பையில் வைக்கப்பட்டிருந்த 12 பவுன் நகைகள் திருட்டு போயிருப்பதை அறிந்தாா்.
இது குறித்து தாலுகா காவல் நிலையத்தில் அன்னலட்சுமி புகாா் செய்தாா். இதன் பேரில் காவல் துறையினா் வழக்குப் பதிந்து தனியாா் பேருந்தில் இருந்த கண்காணிப்பு கேமராவில் பதிவான காட்சிகளை ஆய்வு செய்தனா். இதில், அன்னலட்சுமியின் பையிலிருந்து 2 போ் நகைப் பெட்டியைத் திருடிக் கொண்டு பேருந்திலிருந்து இறங்கிச் செல்வது தெரிய வந்தது.
இதன் அடிப்படையில், மதுரை மாவட்டம் மேலூா், சொக்கம்பட்டி பாரதியாா்புரத்தைச் சோ்ந்த பாண்டிமுருகன் மகன் சண்முகம் (26), விருதுநகா் அருப்புக்கோட்டை மீனாட்சிபுரத்தை சோ்ந்த முருகன் மகன் கண்ணன் என்கிற சித்திக் (23) ஆகியோரை புதன்கிழமை கைது செய்தனா்.
