சமூக வலைதள ஜோசியரின் விடியோவால் நாமக்கல் நரசிம்மா் கோயிலில் குவிந்த பக்தா்கள்!

நாமக்கல்: பொருளாதாரத்தில் மேன்மை பெற வேண்டுமெனில், நாமக்கல் நரசிம்மா் கோயிலில் தியானம் செய்ய வேண்டும் என சமூக வலைதளத்தில் ஜோதிடா் ஒருவா் கூறிய விடியோ வைரலானதால், பல்வேறு மாவட்டங்களில் இருந்து ஏராளமான பக்தா்கள் திங்கள்கிழமை காலை கோயிலில் குவிந்ததால் பரபரப்பு ஏற்பட்டது.

நாமக்கல் நகரின் மையப் பகுதியில் பிரசித்தி பெற்ற நரசிம்ம சுவாமி, நாமகிரி தாயாா் கோயில் அமைந்துள்ளது. மாா்கழி மாதம் இந்தக் கோயிலில் பல்வேறு நிகழ்ச்சிகள் நடைபெறுவது வழக்கம். தினசரி காலை 6 மணி முதல் நண்பகல் 1 மணி வரையும், மாலை 4 முதல் இரவு 8 மணி வரை கோயில் நடை திறந்திருக்கும்.

இந்த நிலையில், மாா்கழி மாத முதல்நாளான திங்கள்கிழமை காலை 5 மணி முதல் நாமக்கல் நரசிம்மா் கோயிலுக்கு கா்நாடகம், ஆந்திரம் உள்ளிட்ட மாநிலங்களில் இருந்தும் நாமக்கல், சேலம், ஈரோடு, கரூா், விழுப்புரம், கடலூா், சென்னை உள்பட பல்வேறு மாவட்டங்களில் இருந்தும் ஆயிரத்துக்கும் மேற்பட்ட பக்தா்கள் குவிந்தனா். தொடா்ந்து சூரிய உதயத்துக்கு பின் அவா்கள் கோயில் வளாகம் முழுவதும் வரிசையாக ஒரே இடத்தில் அமா்ந்து ஒரு மணி நேரம் தியானம் செய்தனா். அதன் பிறகு, நாமகிரி தாயாா், நரசிம்மா் சுவாமியை வழிபட்டனா்.

சமூக வலைதளம் ஒன்றில் ஆன்மிக ஜோதிடா் பிரபாகரன் என்பவா், 10 ஆண்டுகளுக்குப் பிறகு மீன ராசியில் ராகு, கன்னி ராசியில் கேது சஞ்சாரம் செய்வதால், நாமக்கல் நரசிம்மா் கோயிலில் உள்ள லட்சுமி நரசிம்மா் மற்றும் நாமகிரி தாயாருக்கு சிறப்பு பூஜை செய்து வழிபாடு, தியானம் மேற்கொண்டால் சகலவித செல்வங்கள் கிடைக்கும் என தெரிவித்திருந்தாா். இந்த விடியோ சமூக வலைதளங்களில் வைரலானது. இதனைக் கண்ட பல்வேறு பகுதி மக்களும் திடீரென நாமக்கல் நரசிம்மா் கோயிலில் குவிந்ததால், இட நெருக்கடியும், கோட்டை சாலையில் போக்குவரத்து நெரிசலும் ஏற்பட்டது.

இதுகுறித்து நரசிம்மா் கோயில் தலைமை அா்ச்சகா் ராஜா கூறுகையில், மாா்கழி மாதம் 1-ஆம் தேதி சூரியன் தனது ராசி பயணத்தை தனுசு ராசிக்கு செலுத்தக்கூடிய தினமாகும், சில ஜோதிடா்கள் சமூக வலைதளங்கள் மூலம் காலை 6.15 மணி முதல் 7.15 வரை நாமகிரி தாயாரை வேண்டி மந்திரங்கள் சொன்னால் செல்வம் அதிகரிக்கும் என கூறியிருந்தனா்.

பொதுவாக நரசிம்மா், நாமகிரி தாயாரை எப்போது வழிபட்டாலும் அருள் கிடைக்கும். கிரகங்கள் 10 ஆண்டுகளுக்கு பிறகுதான் கூடும் என ஜோதிடா் கூறியதால்தான் ஏராளமானோா் திடீரென திரண்டு தியானத்தில் ஈடுபட்டனா் என்றாா்.