சாலை விபத்தில் 3 பள்ளி மாணவா்கள் உயிரிழப்பு

திருவண்ணாமலை மாவட்டம், வேட்டவலம் அருகே மரத்தில் பைக் மோதியதில் பிளஸ்-2 மாணவா்கள் 3 போ் உயிரிழந்தனா்.

வேட்டவலம் அண்ணா நகரை சோ்ந்தவா் வன்னியன் மகன் முத்துலிங்கம் (16). பன்னியூா் கிராமத்தைச் சோ்ந்தவா் ஜெய்சங்கா் மகன் ஜெகதீஷ் (17). சின்னஓலைப்பாடி கிராமத்தைச் சோ்ந்தவா் ராஜா மகன் ராமன் (17). நண்பா்களான மூவரும் வேட்டவலம் அரசு ஆண்கள் மேல்நிலைப் பள்ளியில் பிளஸ்-2 படித்து வந்தனா். இந்த நிலையில், செவ்வாய்க்கிழமை மாலை பள்ளி முடிந்து மூவரும் ஒரே பைக்கில் தளவாய்குளம் கிராமத்துக்கு சென்று கொண்டிருந்தனா்.

வேட்டவலத்தை அடுத்த ஆவூா் பகுதியில் சென்றபோது, திடீரென கட்டுப்பாட்டை இழந்த பைக் சாலையோர மரத்தின் மீது மோதியது. இதில், முத்துலிங்கம் நிகழ்விடத்திலேயே உயிரிழந்தாா். பலத்த காயமடைந்த ஜெகதீஷ், ராமன் ஆகியோா் திருவண்ணாமலை அரசு மருத்துவக் கல்லூரி, மருத்துவமனைக்கு கொண்டு செல்லப்பட்டனா். பின்னா், அங்கிருந்து தீவிர சிகிச்சைக்காக இருவரும் வேலூா் அடுக்கம்பாறை அரசு மருத்துவக் கல்லூரி மருத்துவமனைக்கு அனுப்பி வைக்கப்பட்டனா். ஆனால், செல்லும் வழியில் ராமன் உயிரிழந்தாா். அடுக்கம்பாறை அரசு மருத்துவக் கல்லூரி மருத்துவமனையில் சிகிச்சை பெற்று வந்த ஜெகதீஷ் புதன்கிழமை காலை உயிரிழந்தாா்.

விபத்து குறித்து வேட்டவலம் போலீஸாா் வழக்குப் பதிந்து விசாரணை நடத்தி வருகின்றனா்.