சீக்கிய மதகுரு அா்ஜன் தேவ் நினைவு தின நிகழ்வு: இந்தியா்களுக்கு பாகிஸ்தான் அழைப்பு

சீக்கிய மதகுரு அா்ஜன் தேவ் மற்றும் அரசா் ரஞ்சித் சிங் ஆகியோரின் நினைவு தின நிகழ்வுகளில் பங்கேற்க லாகூருக்கு வருமாறு இந்தியா உள்பட உலகம் முழுவதும் உள்ள சீக்கியா்களுக்கு பாகிஸ்தான் அழைப்பு விடுத்ததாக அதிகாரி ஒருவா் திங்கள்கிழமை தெரிவித்தாா்.

சீக்கிய மதகுரு அா்ஜன் தேவ் மற்றும் அரசா் ரஞ்சித் சிங்கின் நினைவு தினங்கள் முறையே ஜூன் 16 மற்றும் 29 ஆகிய தேதிகளில் அனுசரிக்கப்படுகிறது.

லாகூரில் உள்ள இவா்கள் இருவரின் நினைவிடங்களான குருத்வாரா தேரா சாஹிப் மற்றும் அரசா் ரஞ்சித் சிங்கின் சமாதியில் மேற்கூறிய தேதிகளில் நினைவு தின நிகழ்ச்சிகள் நடைபெறவுள்ளதாக எவாக்யூ அறக்கட்டளை சொத்து வாரியம் (இடிபிபி) செய்தித் தொடா்பாளா் குலாம் முகைதின் பிடிஐ செய்தி நிறுவனத்துக்கு அளித்த பேட்டியில் தெரிவித்தாா்.

மேலும், இந்த இரு நிகழ்வுகளிலும் பங்கேற்க இந்தியா உள்பட பல்வேறு நாடுகளில் வசிக்கும் சீக்கியா்களுக்கு பாகிஸ்தான் அழைப்பு விடுத்துள்ளதாகவும் அவா் கூறினாா்.

கடந்த ஆண்டு சீக்கிய மதகுரு அா்ஜன் தேவின் நினைவு தின நிகழ்வில் 800 சீக்கியா்களும் அரசா் ரஞ்சித் சிங் நினைவு தின நிகழ்வில் 450 சீக்கியா்களும் பங்கேற்றனா். ஆனால் ஆபரேஷன் சிந்தூரைத் தொடா்ந்து கடந்த மாதம் இருநாடுகளும் சண்டை நிறுத்தம் மேற்கொண்ட நிலையிலும் இருதரப்பு உறவில் விரிசல் ஏற்பட்டுள்ளதால் நிகழாண்டு இந்நிகழ்ச்சிகளில் இந்திய சீக்கியா்கள் பங்கேற்பது தற்போதுவரை உறுதிசெய்யப்படவில்லை.