சென்னையில் செவ்வாய்க்கிழமை பெய்த மழையால் 12 விமான சேவைகள் பாதிக்கப்பட்டன.
சென்னை மற்றும் புகா் பகுதிகளில் செவ்வாய்க்கிழமை காலையில் இருந்து, விட்டு விட்டு மழை பெய்தது. மேலும், கடும் பனிமூட்டம் காரணமாக சென்னை விமான நிலையத்தில் விமான சேவைகள் பாதிக்கப்பட்டன. விமான நிலையத்தில் ஓடு பாதையில் தண்ணீா் தேங்கவில்லை என்பதை உறுதி செய்த பின்னரே, மிகுந்த பாதுகாப்புடன் விமானங்கள் தரையிறக்க அனுமதிக்கப்பட்டன.
மழை அதிகரித்ததால் சென்னையில் தரையிறங்குவதற்காக வந்த, மதுரை, திருவனந்தபுரம், கோவை, ஹைதராபாத், கொல்கத்தா ஆகிய 5 விமானங்கள் நீண்ட நேரமாக வானில் வட்டமடித்தன. மழை குறைந்த பிறகு விமானங்கள் அடுத்தடுத்து பாதுகாப்பாக தரையிறக்கப்பட்டன.
அதேபோல், சென்னையிலிருந்து ஹைதராபாத், தில்லி, செகந்திராபாத், மும்பை, லக்னௌ உள்ளிட்ட பல்வேறு பகுதிகளுக்கு சென்ற 8 விமானங்கள் தாமதமாக புறப்பட்டுச் சென்றன.
