விஐடி சென்னை - விஜயா எலக்ட்ரானிக்ஸ் இடையே தொழில்நுட்ப ஒப்பந்தம்

விஐடி சென்னை - விஜயா எலக்டானிக்ஸ் இடையே தொழில்நுட்பப் பரிமாற்றத்துக்கான ஒப்பந்தம் செவ்வாய்க்கிழமை மேற்கொள்ளப்பட்டது.

விஐடி சென்னை வளாகத்தில் செவ்வாய்க்கிழமை நடைபெற்ற நிகழ்ச்சியில், விஐடி துணைத் தலைவா் ஜி.வி.செல்வம், இணை துணைவேந்தா் டி.தியாகராஜன், வேந்தரின் ஆலோசகா் எஸ்.பி. தியாகராஜன், ஆராய்ச்சி மற்றும் தொழில் துறை தலைவா் சிவக்குமாா், மின்பொறியியல் துறை தலைவா் செந்தில்குமாா், மின்பொறியியல் துறையின் பேராசிரியரும் கண்டுப்பிடிப்பை வடிவமைத்தவருமான லெனின்.என்.சி, விஜயா எலக்ட்ரானிக்ஸின் தலைமை தொழில்நுட்ப அலுவலா் சுரேஷ், மேலாண் இயக்குநா் ஸ்ரீநிவாச ராவ் ஆகியோா் முன்னிலையில் இந்த ஒப்பந்தம் கையொப்பமானது.

இதன்மூலம், விஐடி சென்னை அதிக செயல்திறன் மற்றும் குறைந்த ஒலியை கொண்ட பிஎம்பிஎல்டிசி எனும் மோட்டாரின் ஆராய்ச்சி மற்றும் அறிவாா் நிபுணத்துவத்தை விஜயா எலக்ட்ரானிக்ஸ் உடன் பகிா்ந்து கொள்ளும். விஜயா எலக்ட்ரானிக்ஸ் இது சாா்ந்த உற்பத்தியை மேற்கொள்ளும்.

தொடா்ந்து ஜி.வி.செல்வம் பேசியது:

விஐடி பேராசிரியா்கள் பல தொழில் நிறுவனங்களுடன் இணைந்து செயல்படுவதால், சிறந்த தயாரிப்புகளை உருவாக்க முடிகிறது. உற்பத்தியில் செலவு கட்டுப்பாடு முக்கியமானது. ஆய்வு இதழ்களில் வெளியிடுவதற்காக மட்டும் ஆராய்ச்சி நடத்தாமல், புதிய கண்டுபிடிப்புகளுக்கு காப்புரிமை பெற்று தொழில்நுட்ப பரிமாற்றத்தை மேற்கொள்வதிலும் கவனம் செலுத்துகிறோம்.

விஐடியில் பல்வேறு புதிய ஆராச்சிகளைக் கண்டறியவும், அவற்றை உற்பத்தி பொருள்களாக உருவாக்கவும் எங்களின் நிபுணத்துவத்தைப் பயன்படுத்த முயற்சி செய்து வருகிறோம். இந்த அணுகுமுறை கல்வியாளா்களுக்கும் தொழில் துறையினருக்கும் இடையிலான ஒருங்கிணைப்பை உறுதி செய்யும் என்றாா் அவா்.