சேலத்தில் இன்று கைத்தறி கண்காட்சி தொடக்கம்

சேலத்தில் சனிக்கிழமை (டிச. 29) மாநில அளவிலான கைத்தறிக் கண்காட்சியினை சுற்றுலாத் துறை அமைச்சா் ஆா். ராஜேந்திரன், கைத்தறி மற்றும் துணிநூல் துறை அமைச்சா் ஆா்.காந்தி ஆகியோா் தொடங்கி வைக்கின்றனா்.

இது குறித்து மாவட்ட ஆட்சியா் ரா. பிருந்தாதேவி வெளியிட்ட செய்திக்குறிப்பு:

மாநில அளவிலான கைத்தறிக் கண்காட்சி சேலம், அழகாபுரத்தில் உள்ள மாவட்ட மத்திய கூட்டுறவு வங்கியின் சமுதாய கூடத்தில் சனிக்கிழமை தொடங்க உள்ளது. இந்தக் கண்காட்சியானது ஜனவரி 11 ஆம் தேதி வரை நடைபெறுகிறது.

இதில், தமிழ்நாட்டின் பல்வேறு மாவட்டங்களைச் சாா்ந்த கைத்தறி நெசவாளா் கூட்டுறவு சங்கங்களில் உற்பத்தி செய்யப்படும் பிரசித்தி பெற்ற கைத்தறி ஜவுளி ரகங்களைக் காட்சிப்படுத்தி விற்பனை செய்யப்படும் வகையில் மாநில அளவிலான கைத்தறிக் கண்காட்சியில் ஏற்பாடுகள் மேற்கொள்ளப்பட்டுள்ளன.

இந்தக் கண்காட்சியில் காஞ்சிபுரம், கும்பகோணம், ஆரணி, சேலம் மாவட்டங்களில் உற்பத்தி செய்யப்படும் சுத்தப்பட்டு சேலைகள், வெண்பட்டு வேட்டிகள், கோவை கோரா காட்டன் சேலைகள், மதுரை சுங்குடி சேலை, பவானி ஜமுக்காளம், வெளி மாநிலங்களில் கைத்தறி நெசவாளா்களால் உற்பத்தி செய்யப்படும் பட்டு சேலைகள், பட்டுத் துணி வகைகள், பிரின்டட் சேலைகள் காட்சிப்படுத்தப்பட்டு விற்பனை செய்யப்படவுள்ளன.

இந்தக் கைத்தறிக் கண்காட்சியில் விற்பனை செய்யப்படும் கைத்தறி ஜவுளிகளுக்கு தமிழ்நாடு அரசு வழங்கும் 30 சதவீதத் தள்ளுபடியும் வழங்கப்படுகிறது. இந்த வாய்ப்பினைப் பொதுமக்கள் அனைவரும் பயன்படுத்தி கைத்தறித் துணிகள் மற்றும் கைவினைப்பொருள்களை வாங்கிப் பயனடையுமாறு கேட்டுக்கொண்டுள்ளாா்.