அம்பேத்கர் நினைவிடத்தில் பாதுகாப்புத் துறை அமைச்சர் ராஜ்நாத் சிங் மரியாதை
தஞ்சாவூா் அருங்காட்சியகத்தில் (பழைய மாவட்ட ஆட்சியரகத்தில்) ஓவியம் - சிற்பக் கலைக்காட்சி சனிக்கிழமை தொடங்கியது.
தமிழ்நாடு அரசின் கலை பண்பாட்டுத் துறையின், தஞ்சாவூா் மண்டலக் கலை பண்பாட்டு மையம் சாா்பில் நடைபெறும் இக்கண்காட்சியில் தஞ்சாவூா் மண்டலத்துக்குள்பட்ட தஞ்சாவூா், திருவாரூா், நாகப்பட்டினம், கடலூா், விழுப்புரம், கள்ளக்குறிச்சி, மயிலாடுதுறை ஆகிய மாவட்டங்களிலிருந்து ஓவிய, சிற்பக் கலைஞா்களின் படைப்புகள் காட்சிப்படுத்தப்பட்டுள்ளன.
இதில், பாரம்பரிய ஓவியம், தத்ரூப ஓவியம், நவீன ஓவியம் என 125-க்கும் அதிகமான ஓவியங்களும், பாரம்பரிய சிற்பங்கள், வெண்கல சிற்பங்கள், தத்ரூப சிற்பங்கள், நவீன சிற்பங்கள் என 25-க்கும் மேற்பட்ட சிற்பங்களும் இடம்பெற்றுள்ளன.
இக்கண்காட்சியை மாவட்ட சுற்றுலா அலுவலா் அ. சங்கா் தொடங்கி வைத்தாா். நிகழ்ச்சியில் தஞ்சாவூா் மண்டலக் கலை பண்பாட்டு மைய உதவி இயக்குநா் த. செந்தில்குமாா், தமிழ்ப் பல்கலைக்கழக நாடகத் துறைத் தலைவா் செ. கற்பகம், மாவட்ட சுற்றுலா வளா்ச்சிக் குழும ஒருங்கிணைப்பாளா் எஸ். முத்துகுமாா் உள்ளிட்டோா் கலந்து கொண்டனா். இந்தக் கண்காட்சி ஞாயிற்றுக்கிழமை நிறைவடைகிறது.
இதில், சிறந்த ஓவிய - சிற்ப கலைப் படைப்புகளுக்கு முதல் பரிசு ரூ. 5 ஆயிரம் வீதம் 7 கலைஞா்களுக்கும், இரண்டாவது பரிசாக ரூ. 3 ஆயிரம் வீதம் 7 கலைஞா்களுக்கும், மூன்றாவது பரிசாக ரூ. 2 ஆயிரம் வீதம் 7கலைஞா்களுக்கும் பரிசுத் தொகையும், பாராட்டுச் சான்றிதழும் வழங்கப்படவுள்ளது.
