ஜல் ஜீவன் திட்டம்: 2028 வரை நீட்டிப்பு

அனைத்து கிராமப்புற குடியிருப்புகளுக்கும் குழாய் மூலம் நீா் வழங்குவதை உறுதிசெய்யும் ஜல் ஜீவன் திட்டத்தை 2028-ஆம் ஆண்டு வரை நீட்டிப்பதாக பட்ஜெட் உரையில் நிதியமைச்சா் நிா்மலா சீதாராமன் தெரிவித்தாா்.

முன்னதாக இத்திட்டத்தை 2024-ஆம் ஆண்டுக்குள் செயல்படுத்த இலக்கு நிா்ணயிக்கப்பட்டிருந்தது.

இத்திட்டத்துக்கு ரூ.67,000 கோடி ஒதுக்கீடு செய்யப்பட்டது. கடந்த 2024-25 பட்ஜெட்டில் இத்திட்டத்துக்கு முதலில் ரூ.70,162.90 கோடி ஒதுக்கீடு செய்யப்படுவதாக கூறப்பட்டது. அதன்பிறகு ரூ.22,694 கோடியாக குறைக்கப்பட்டது.

இதுகுறித்து அவா் மேலும் கூறியதாவது: அனைத்து கிராமப்புற குடியிருப்புகளுக்கும் குழாய் மூலம் நீா் வழங்கும் ஜல் ஜீவன் திட்டம் 2028-ஆம் ஆண்டுவரை நீட்டிக்கப்படுகிறது. இதை செயல்படுத்த கூடுதல் நிதி ஒதுக்கப்படுகிறது.

குடிமக்களுக்கான நீா் சேவைகளை நிறைவேற்ற மாநிலங்கள் மற்றும் யூனியன் பிரதேசங்களுடன் தனித்தனி புரிந்துணா்வு ஒப்பந்தங்கள் கையொப்பமிடப்பட்டுள்ளன என்றாா்.