ஜோலார்பேட்டை ரயில்வே பாலம்: ``பல ஆண்டுகளாக புகார் அளித்தும் எதுவும் மாறவில்லை'' - குமுறும் மக்கள்

திருப்பத்தூர் மாவட்டம் ஜோலார்பேட்டை அடுத்த சின்னக்கம்மியம்பட்டு அருகே அமைந்துள்ளது இரயில்வே பாலம். நாட்றம்பள்ளி மற்றும் வாணியம்பாடியிலிருந்து வரும் வாகன ஓட்டிகள், பாதசாரிகள், அப்பகுதி மக்கள் என அனைவரும் இந்த வழியைப் பயன்படுத்தி வருகின்றனர். இங்குப் பல வருடங்களாகவே பொதுமக்கள் ‌அவ்வழியைக் கடக்க பல்வேறு சிரமங்களை சந்தித்து வருகின்றனர்.

இது குறித்து சின்னக்கம்மியம்பட்டு கிராம மக்களிடம் விசாரித்த போது, "இந்த வழியில் எப்போதும் தண்ணீர் நின்று கொண்டே இருக்கும். மழைக்காலங்களில் இடுப்பு அளவு தண்ணீர் தேங்கி நிற்கும். எங்கள் ஊருக்கு செல்வதற்க்கு வேறு வழி இல்லை. வெறும் நான்கே வழிகள் தான் ஏரிக்கொடி, ரெட்டியூர், புதூர், மற்றும் இந்த இரயில்வே பாலம். இந்த ஒவ்வொரு வழிக்கும் கிட்டத்தட்ட மூன்று முதல் நான்கு கி.மீ. இடைவெளி இருக்கும்.

இந்த‌ சூழல் இருப்பதால் பெரும்பாலான நேரங்களில் சுத்திக் கொண்டு தான் எங்கள் ஊருக்கு வருகிறோம். ஆனால் நாங்கள் பெரும்பாலும் உபயோகப்படுத்துவது ரெட்டியூர் மற்றும் இந்த இரயில்வே வழி‌ தான், காரணம் உணவகங்கள், காய்கறிக் கடைகள், அரசு மற்றும் தனியார்ப் பள்ளிகள், மருத்துவமனை போன்றவை அமைந்துள்ளன. மேலும், வெளியூருக்குச் செல்வதற்கும் இந்த வழியே பயணம் மேற்கொள்கிறோம்.

பிரச்னையே தண்ணீர் தேங்குவது தான். அது அப்படியே தேங்காமல் சென்றால், பாதிப்பு இருக்காது. பாதை மிகவும் பள்ளமாகவும், குண்டும் குழியுடனும் இருக்கிறது. போதாதற்கு ஏரியிலிருந்து தண்ணீர் உடைந்து இந்த பாதையில் சேர்கிறது. கிணறுகள் நிரம்பி வழிந்தாலும் இந்த பாதையில் தான் தேங்கி நிற்கும். இதனால் எங்கள் பிள்ளைகளை ஸ்கூலுக்கு நேரத்திற்கு விட முடியாமல், நான்கு கி.மீ. சுத்திக் கொண்டு தான் பள்ளிக்குச் சென்றடைகிறோம்.

ஆத்திர அவசரத்துக்கு மருத்துவமனைக்குக் கூட செல்ல முடியவில்லை. மீறி வேகமாகச் சென்றால் வண்டியின் சைலென்சர்க்குள் தண்ணீர் புகுந்து, எங்களுக்குப் பெரிய செலவை ஏற்படுத்தி விடுகிறது. நாங்களும் பல ஆண்டுகளாக அதிகாரிகளிட இது தொடர்பாகப் பல முறை கூறியுள்ளோம். அவர்களும் நடவடிக்கை எடுக்கிறோம்‌ என்கிறார்கள். ஆனால் இதுவரை எதுவும் மாறவில்லை. ஒரு வருடங்களுக்கு முன்பாக வந்துப் பார்த்தார்கள். ஆனால் நடவடிக்கை எடுக்கவில்லை. எதற்கு வந்தார்கள் என்றே தெரியவில்லை. அப்படியே சென்று விட்டார்கள். இந்த வழியில் பயணிப்பதற்கு எதாவது ஏற்பாடு செய்து கொடுத்தால் நன்றாக இருக்கும் என்றனர்.

இது குறித்து ஒரு வாகன ஓட்டி கூறுகையில், "நான் தினமும் இந்த வழியே வேலைக்குச் செல்வேன். தண்ணீர் அதிக அளவு இருந்தாலே மிகவும் சிரமம் தான். வேறு வழியில் சென்றால் பெட்ரோலுக்கு அதிக பணம் செலவாகிறது. சில முறை வண்டியை நேக்காக ஓரமாக ஓட்டிக்கொண்டு சென்று விடுவேன். ஒரு முறை டயர்‌ வழுக்கி கீழே விழுந்துவிட்டேன். ஊருக்கு ஒதுக்குப் புறமாக இருப்பதால் என்னைத் தூக்கவும் யாரும் வரல," என்று‌ வேதனையுடன் கூறினார்.

இந்த விவகாரம் தொடர்பாகத் திருப்பத்தூர் தாலுகாவில் வேலை செய்யும் பணியாளர்களிடம் விளக்கம் கேட்டபோது, "இது போன்ற இடங்களை பார்வையிட்டுத் தான் வருகிறோம். இதற்கு விரைந்து எதாவது மாற்று ஏற்பாடு செய்கிறோம்," என்றனர்.