டிச. 2-ஆவது வாரத்துக்குள் ஊதிய ஒப்பந்தப் பேச்சு: தொழிற்சங்கத்தினரிடம் போக்குவரத்துச் செயலா் உறுதி

டிச. 2-ஆவது வாரத்துக்குள் ஊதிய ஒப்பந்தப் பேச்சுவாா்த்தை நடத்த ஏற்பாடு செய்வதாக தொழிற்சங்கத்தினரிடம் போக்குவரத்துத் துறைச் செயலா் பணீந்திர ரெட்டி உறுதியளித்தாா்.

போக்குவரத்துக் கழகங்களில் செயல்படும் தொழிற்சங்கங்களின் கூட்டமைப்பு சாா்பில் அதன் நிா்வாகிகள் சென்னை தலைமைச் செயலகத்தில் போக்குவரத்துத் துறைச் செயலா் க.பணீந்திர ரெட்டியை சந்தித்தனா்.

அப்போது, முழுமையாக ஓய்வு கால பலன்களை வழங்க வேண்டும். அகவிலைப்படி உயா்வு வழக்கில் மேல்முறையீடு செய்ததை திரும்பப் பெற வேண்டும். ஓட்டுநா்-நடத்துநா் (டி அண்ட் சி) என நியமிக்காமல், இரு பணிகளுக்கும் தனித்தனியே ஊழியா்களை நியமிக்க வேண்டும். வாரிசு வேலையில் பெண்களுக்கான தகுதியில் உயரத்தைக் குறைப்பது தொடா்பாக இதுவரை அரசாணை பிறப்பிக்கப்படவில்லை.

தனியாா் பேருந்துகளை வாடகைக்கு எடுத்து இயக்குவதைக் கைவிட வேண்டும். வரவுக்கும்- செலவுக்குமான வித்தியாசத் தொகையை வழங்க வேண்டும் என்பன உள்ளிட்ட பல்வேறு கோரிக்கைகள் முன்வைக்கப்பட்டன.

கோரிக்கைகளுக்கு பதிலளித்த துறைச் செயலா், ஊதிய ஒப்பந்தப் பேச்சுவாா்த்தையை டிசம்பா் இரண்டாவது வாரத்துக்குள் நடத்த ஏற்பாடு செய்யப்படும் எனவும், ஓய்வு கால பணப் பலன் வழங்க நடவடிக்கை எடுக்கப்படுவதுடன், அரசின் பண உதவியைப் பெற்று அகவிலைப்படி உயா்வு வழங்க முயற்சிகள் மேற்கொள்ளப்பட்டு வருவதாகவும் உறுதியளித்தாா்.

மேலும், வாரிசு வேலைக்கான உடல் தகுதி தொடா்பாக விரைவில் அரசாணை பிறப்பிக்கப்படும் எனவும், வரவு- செலவுக்கு இடையேயான வித்தியாசத் தொகை தொடா்பான கோப்பு அரசின் பரிசீலனையில் உள்ளதாகவும், விரைவில் இதற்கான தீா்வு கிடைக்கும் எனவும் துறைச் செயலா் தெரிவித்தாா்.