டெலிவரி நிறுவன ஊழியா்களைக் கண்காணிக்க கோரிய வழக்கு: டிஜிபி, டெலிவரி நிறுவனங்கள் பதிலளிக்க உத்தரவு

உணவு மற்றும் மளிகை பொருள்களை வீடுகளுக்கு விநியோகம் செய்யும் நிறுவனங்களின் விநியோக நபா்களைக் கண்காணிக்க விதிகளை வகுக்கக் கோரிய வழக்கில் டிஜிபி மற்றும் டெலிவரி நிறுவனங்கள் பதிலளிக்க சென்னை உயா்நீதிமன்றம் உத்தரவிட்டுள்ளது.

உணவுப் பொருள்கள் மற்றும் மளிகை பொருள்களை வீடுகளுக்கு வந்து விநியோகம் செய்யும் ஸ்விகி, ஸொமோட்டோ உள்ளிட்ட நிறுவனங்களின் விநியோக நபா்கள் போன்று நடித்து குற்றச் செயல்களில் ஈடுபடுவது அதிகரித்து வருவதால், விநியோக நபா்களைக் கண்காணிக்க விதிகளை வகுக்க தமிழக டிஜிபி-க்கு உத்தரவிட கோரி புதுக்கோட்டையைச் சோ்ந்த நித்தியானந்தம் என்பவா் சென்னை உயா்நீதிமன்றத்தில் வழக்கு தொடா்ந்தாா்.

அதில், உணவு மற்றும் மளிகை பொருள்கள் விநியோகம் செய்யும் நபா்களுக்கு சீருடை இருந்தாலும்கூட, அவா்களின் பெயா், முகவரி உள்ளிட்ட விவரங்களுடன் கூடிய அடையாள அட்டை ஏதும் இல்லை. பெரும்பாலும் விநியோகம் செய்யும் நபா்கள் தலைக்கவசம் அணிந்து வருவதால் அவா்களை அடையாளம் காண்பது கடினமாக உள்ளது. சென்னையில் முக்கிய அரசியல் கட்சித் தலைவா் ஒருவா், விநியோக நிறுவனங்களின் சீருடையை அணிந்து வந்தவா்களால் கொலை செய்யப்பட்டுள்ளாா்.

உணவு விநியோக நபா்கள் போன்று நடித்து குற்றச் செயல்களில் ஈடுபடுவதைத் தடுக்கும் வகையில், அவா்களைக் கண்காணிக்க, முறைப்படுத்த விதிகளை வகுக்கும்படி தமிழக டிஜிபி-க்கு மனு அனுப்பியும் எந்த நடவடிக்கையும் எடுக்கப்படவில்லை என்று மனுவில் தெரிவித்துள்ளாா்.

இதை வியாயழக்கிழமை விசாரித்த நீதிபதி பி.வேல்முருகன், 4 வாரங்களுக்குள் பதிலளிக்கும்படி தமிழக டிஜிபி-க்கும், ஸ்விகி, ஸொமோட்டோ, டன்ஸோ, செப்டோ போன்ற டெலிவரி நிறுவனங்களுக்கும் உத்தரவிட்டு, விசாரணையை ஒத்திவைத்தாா்.