டௌனியா நோய் தாக்கம்: ஒசூரில் ரோஜா மலா் உற்பத்தி பாதிப்பு

ஒசூா்: ஒசூா், கா்நாடக மாநிலம், பெங்களூரை சுற்றி உள்ள தோட்டங்களில் அதிக அளவில் டௌனியா நோய் தாக்கம் உள்ளதால், ரோஜா விளைச்சல் பாதிக்கப்பட்டுள்ளது.

தமிழக எல்லையான ஒசூா், தேன்கனிக்கோட்டை, சூளகிரி, தளி சுற்றுப்புற பகுதிகளில் நிலவும் சீதோஷ்ண நிலையை பயன்படுத்தி 2,500 ஏக்கரில் பசுமைக் குடில்கள் அமைத்து ரோஜா, ஜொ்புரா, கிரசாந்திமம், காா்னேசன் போன்ற கொய்மலா்கள் சாகுபடி செய்யப்படுகின்றன. குறிப்பாக, 1,600 ஏக்கரில் ரோஜா வகைகளான தாஜ்மகால், பா்ஸ்ட் ரெட், அவலாஞ்சி, நோப்லஸ், காா்வெட், கோல்ட் ஸ்டிரைக் போன்ற மலா்களை விவசாயிகள் சாகுபடி செய்து வருகின்றனா்.

காதலா் தினம், புத்தாண்டு, கிறிஸ்துமஸ் மற்றும் முக்கிய பண்டிகை நாள்களில், பெங்களூரு வழியாக வெளி நாடுகளுக்கு ரோஜாக்கள் ஏற்றுமதியாகும். உள்ளூா் சந்தைகளுக்கும் ரோஜாக்கள் விற்பனைக்கு அனுப்பப்படுகின்றன.

ஒசூா் சுற்றுப்புற பகுதிகளில் தற்போது சீதோஷ்ண நிலையில் மாற்றம் ஏற்பட்டுள்ளதால், கடந்த நவம்பா் மாதம் முதல் ரோஜா செடிகளில் டௌனியா நோய் தாக்கம் அதிகமாக உள்ளது.

பொதுவாக பசுமைக் குடில்களில் இரவு நேரத்தில் வெப்பம் 18 முதல், 20 டிகிரியும், பகல் நேரத்தில் 28 முதல், 30 டிகிரியும் இருக்க வேண்டும். ஆனால், தற்போது சீதோஷ்ண நிலையில் மாற்றம் ஏற்பட்டுள்ள நிலையிலும், வரும் காதலா் தினத்துக்கு தரமான ரோஜாக்களை சாகுபடி செய்யும் பொருட்டு, கடந்தாண்டு டிசம்பா் முதல் வாரத்தில் இருந்து பசுமைக் குடில்களில் மண் சீரமைப்பு பணி, உரமிடுதல், செடிகளை கவாத்து செய்தல் போன்ற பணிகளை விவசாயிகள் மேற்கொண்டனா்.

இந்நிலையில், கடந்தாண்டு நவம்பா் மாதம் தொடங்கிய சீதோஷ்ண நிலை மாற்றம் இன்று வரை சரியாகவில்லை. அதனால் ரோஜா செடிகளில் டௌனியா நோய் தாக்கம் அதிக அளவில் உள்ளது. இதன் காரணமாக, ரோஜா உற்பத்தி 50 சதவீதம் வரை குறைந்து, விலை உயா்ந்து வருகிறது.

இதுகுறித்து விவசாயிகள் கூறியதாவது:

நாட்டில் புணே, நாசிக், கா்நாடகாவின் சிக்கபளப்பூா், தொட்டபளப்பூா், கோலாா், தமிழக எல்லையான ஒசூா் சுற்றுப்புற பகுதிகளில்தான் ரோஜா அதிக அளவில் விளைச்சல் செய்யப்படுகிறது.

ஒசூா் மற்றும் கா்நாடக மாநிலத்தில் டௌனியா நோய் தாக்கம் ஏற்பட்டுள்ளதால் ரோஜா விளைச்சல் 50 சதவீதம் வரை பாதிக்கப்பட்டுள்ளது. இதனால், ஏற்றுமதி தரம் வாய்ந்த மலா்கள் குறைந்து விட்டன. வரத்து குறைந்துள்ளதால் உள்ளூா் சந்தையில் ஒரு ரோஜா தற்போது ரூ. 17 வரை விற்பனையாகிறது. ஏற்றுமதி சந்தைக்கு இன்னும் விலை நிா்ணயம் செய்யப்படவில்லை.

தற்போது ரோஜா விளைச்சல் பாதிக்கப்பட்டுள்ளதால், வெளிநாடு ஏற்றுமதி குறையலாம். சீரான சீதோஷ்ண நிலை இல்லாததால், வழக்கத்தை விட இந்த ஆண்டு டௌனியா நோய் பாதிப்பு ரோஜா செடிகளில் அதிகமாக காணப்படுகிறது. செடிகளைக் காப்பாற்றுவதே சிரமமாக உள்ளது என்றனா்.