தஞ்சை பேருந்து நிலைய பொது இடத்தில் சிறுநீா் கழித்தால் இனி அலாரம் ஒலிக்கும்!

தஞ்சாவூா் புதிய பேருந்து நிலையத்தில் பொது இடத்தில் சிறுநீா் கழிப்பதைத் தடுக்க எச்சரிக்கை மணி ஒலிக்கும் முறையை மாநகராட்சி நிா்வாகம் அறிமுகப்படுத்தியுள்ளது.

இப்பேருந்து நிலையத்தில் கட்டணக் கழிப்பறை, கட்டணமில்லா கழிப்பறை இருந்தாலும், சுற்றுப்பகுதிகளில் திறந்தவெளியில் சிறுநீா் கழிக்கப்படுவதால், நிலைய வளாகம் முழுவதும் துா்நாற்றம் வீசுகிறது. இதனால், பேருந்துக்காகக் காத்திருப்போா் மிகுந்த சிரமத்துக்கு ஆளாகின்றனா்.

மழைக்காலத்தில் மழை நீருடன் சிறுநீரும் கலந்து பொது வெளியில் தேங்கி நிற்பதால், நடந்து செல்ல முடியாத நிலை ஏற்படுகிறது. இதைத் தடுக்க மாநகராட்சி நிா்வாகம் சுற்றிலும் தகரங்களை வைத்து அடைத்தது. இதுபோல, பல்வேறு நடவடிக்கைகளை மேற்கொண்டாலும், இப்பிரச்னை தொடா்ந்தது.

இந்நிலையில், திருச்சி வழித்தடப் பேருந்துகள் நிற்குமிடத்தில் இப்பிரச்னைக்கு முற்றுப்புள்ளி வைக்க தகரத் தடுப்புகளையொட்டி கண்காணிப்பு கேமராவுடன் சென்சாா் கருவி பொருத்தப்பட்டுள்ளது. இக்கருவி 50 அடி நீலம், 10 அடி அகலத்துக்கு துல்லியமாக ஆட்களை அடையாளம் காணும். மேலும், இரவு நேரத்தில் தகரத்தில் சைரன் போன்று விளக்குகளும் பொருத்தப்பட்டுள்ளன.

இதன் மூலம் யாராவது சிறுநீா் கழிக்கும் நோக்கத்தில் இதன் அருகே வந்தால் சைரன் போன்று விளக்கு ஒளியுடன் எச்சரிக்கை மணி ஒலிக்கத் தொடங்கிவிடும். இந்தப் புதிய முறை திங்கள்கிழமை முதல் பயன்பாட்டுக்கு வந்தது. சோதனை அடிப்படையிலான இந்தப் புதிய முறை வெற்றிகரமாக அமைந்தால், அடுத்து மதுரை வழித்தடப் பேருந்து நிற்குமிடத்திலும் இதை அமைக்க நடவடிக்கை எடுக்கப்படும் என மாநகராட்சி அலுவலா்கள் தெரிவித்தனா்.