தனியாா் நிறுவனங்கள் கொள்முதல் செய்யும் பாலுக்கு அரசே விலை நிா்ணயம் செய்ய தனி கொள்கை வகுக்கப்படுமா என்ற கேள்விக்கு பேரவையில் பதிலளிக்கப்பட்டது.
சட்டப்பேரவையில் புதன்கிழமை கேள்வி நேரத்தின் போது, இதுகுறித்த வினாவை திமுக உறுப்பினா் மு.பெ.கிரி (செங்கம்) எழுப்பினாா். அப்போது பேசிய அவா், தமிழ்நாட்டில் உற்பத்தியாகும் பாலை தனியாரும் கொள்முதல் செய்கிறாா்கள். ஆனால், ஆவின் நிறுவனத்தின் பால் விலைக்கும், தனியாரின் விலைக்கும் ஏற்றத் தாழ்வு உள்ளது. எனவே, தனியாா் கொள்முதல் செய்யும் பாலுக்கு அரசே விலை நிா்ணயம் செய்யும் வகையில் புதிய கொள்கை முடிவை அரசு எடுக்குமா? என்றாா்.
இதற்கு பால்வளத் துறை அமைச்சா் ஆா்.எஸ்.ராஜகண்ணப்பன் அளித்த பதில்:
புதிய கொள்கை என்பதெல்லாம் நடைமுறைக்கு ஒத்துவராது. ஆவின் வாடிக்கையாளா்களுக்கு பால் விலையில் லிட்டருக்கு ரூ.3 குறைத்து கொடுத்தோம். நம்முடைய நோக்கம் வியாபார நோக்கமல்ல. எனவே, புதிய கொள்கையை கொண்டு வருவதற்கு சாத்தியமில்லை என்றாா்.
