``தன்னை இளைஞர் என்று சொல்லும் 54 வயதான தலைவர்.." - நாடாளுமன்றத்தில் அமித்ஷா பேச்சு!

நடந்துவரும் நாடாளுமன்றக் கூட்டத்தில் அரசியலமைப்பின் 75 ஆண்டுகளை நினைவுகூரும் விவாதம் நடந்தது. அப்போது ராஜ்யசபாவில் பேசிய அமித் ஷா, ``அரசியலமைப்பு ஒருபோதும் மாறாதது என்றெல்லாம் கருதப்படவில்லை. அரசியலமைப்பை திருத்துவதற்கான விதி 368-ல் உள்ளது. தன்னை 'யுவா' (இளைஞர்) என்று அழைத்துக்கொள்ளும் 54 வயதான தலைவர், நாங்கள் இதை மாற்றுவோம் என்று கூறிக்கொண்டு, அரசியலமைப்புடன் சுற்றித் திரிகிறார். அரசியலமைப்பை திருத்துவதற்கான ஏற்பாடு நமது அரசியலமைப்பிலேயே கட்டமைக்கப்பட்டுள்ளது.

காங்கிரஸ் 55 ஆண்டுகள் ஆட்சி செய்து அரசியலமைப்பில் 77 மாற்றங்களைச் செய்தது. பா.ஜ.க 16 ஆண்டுகள் ஆட்சி செய்து 22 மாற்றங்களை மட்டுமே செய்துள்ளது. ஆனால் விளைவு என்ன? மாற்றங்களைச் செய்ததன் நோக்கம் என்ன? ஜனநாயகத்தை வலுப்படுத்துவதா அல்லது அதிகாரத்தில் நிலைபெறுவதற்காக மாற்றப்பட்டதா? ராகுல் காந்தி கொண்டு சென்ற அரசியலமைப்பின் நகல் 'போலி'. அது வெற்று நகல் என்பது அம்பலப்படுத்தப்பட்டுள்ளது.

நாட்டின் அரசியலமைப்பு ஆபத்தில் இருக்கிறது என்ற கூற்றுக்கள் ஒரு அரசியல் வித்தை மட்டுமே. கடந்த 75 ஆண்டுகளில், அரசியல் சாசனத்தின் பெயரால் காங்கிரஸ் மோசடி செய்தது. அவர்கள் கட்சியை மட்டும் தங்களின் தனிப்பட்ட சொத்தாக கருதாமல், அரசியல் சாசனத்தை தங்கள் 'தனியார் சொத்தாக' கருதுகிறார்கள்" என்றார்.