``பழிவாங்குகிறார்கள்.." - மீண்டும் வெடிக்கிறதா சாம்சங் ஊழியர்கள் போராட்டம்! - என்ன சொல்கிறது CITU?

சாம்சங் ஊழியர்கள் நடத்திய போராட்டம்

அதிகாரப்பூர்வ தொழிற்சங்கம் இல்லாமல் வேலை செய்துவந்த சாம்சங் தொழிலாளர்கள், தொழிற்சங்கம் அமைக்க கடந்த செப்டம்பர் மாதம் 9-ம் தேதி போராட்டத்தை முன்னெடுத்தனர். சாம்சங் ஊழியர்கள் தொடங்கிய இந்தப் போராட்டம், 30 நாள்களைக் கடந்து நடந்தது. இவர்களுக்கு ஆதரவாக சிஐடியு களத்தில் நின்றது. இந்தப் போராட்டத்தின் முடிவில், அக்டோபர் மாதம் சாம்சங் நிர்வாகம் - போராடும் சாம்சங் தொழிலாளர்கள் என இரு தரப்பிலும் அரசு சார்பாக எ.வ.வேலு, டி.ஆர்.பி ராஜா உள்ளிட்ட அமைச்சர்கள் பேச்சுவார்த்தை நடத்தினர். அதைத் தொடர்ந்து வழங்கப்பட்ட சில வாக்குறுதிகளின் அடிப்படையில் போராட்டம் வாபஸ் பெறப்பட்டது.

அமைச்சர் எ.வ.வேலு நடத்திய பேச்சுவார்த்தை

இது தொடர்பாக அப்போது பேசிய அமைச்சர் எ.வ.வேலு, "தொழிலாளர்கள் வேலைக்குத் திரும்ப வேண்டும். வேலை நிறுத்தப் போராட்டத்தில் ஈடுபட்ட தொழிலாளர்கள் மீது சாம்சங் நிர்வாகம் எவ்வித பழிவாங்கும் நடவடிக்கைகளும் எடுக்கக் கூடாது என்ற அடிப்படையில் சுமுகமானப் பேச்சுவார்த்தை சாம்சங் நிர்வாகம் மற்றும் சாம்சங் தொழிலாளர்கள் என இரு தரப்பிலும் நடத்தப்பட்டிருக்கிறது" எனத் தெரிவித்திருந்தார்.

மீண்டும் உண்ணாவிரதப் போராட்டம்...

இந்த நிலையில், போராட்டத்தை முடித்துக்கொண்டு வேலைக்குத் திரும்பிய பல ஊழியர்களுக்கு ஏற்கெனவே செய்த வேலையை வழங்காமல், வேறு வேலைகளில் ஈடுபடுத்தியதாகவும், 30-க்கும் அதிகமானோருக்கு எச்சரிக்கை நோட்டீஸ் வழங்கப்பட்டுள்ளதாகவும், தொழிலாளர்களை பழிவாங்கும் செயலில் சாம்சங் நிர்வாகம் ஈடுபடுவதாகவும் புகார் எழுந்துள்ளது. இந்த விவகாரம் மீண்டும் விஸ்வரூபம் எடுத்திருப்பதால், நாளை (19-ம் தேதி) அடையாள உண்ணாவிரதப் போராட்டத்திற்கு சிஐடியு அழைப்பு விடுத்துள்ளது.

இது தொடர்பாக சிஐடியு மாவட்டக் குழு உறுப்பினர் சிவாவிடம் பேசினோம். அவர், ``சாம்சங் தொழிலாளர்கள் சங்கம் அமைப்பது தொடர்பாக நீதிமன்றம் வழங்கிய தீர்ப்பில், சாம்சங் நிர்வாகம் 6 வார காலத்தில் தொழிற்சங்கம் அமைக்க அனுமதிக்கவோ அல்லது நிராகரிக்கவோ வேண்டும் என உத்தரவிட்டது. இதில் 2 வாரகாலம் முடிந்த நிலையில், சாம்சங் நிர்வாகத்துக்கு தற்போது ஒரு நெருக்கடி சூழல் உருவாகியிருக்கிறது. அமைச்சர்கள் தலைமையில் ஏற்கெனவே நடந்தப் பேச்சுவார்த்தையின் முடிவில், தொழிலாளர்கள் முன்னிலையில் ஒப்பந்தத்தில் கையெழுத்திட்டார்கள். அதில், தொழிற்சங்கத்தின் கோரிக்கைக்கு சாம்சங் நிர்வாகம் ஒருவாரத்தில் பதிலளிக்க வேண்டும் எனக் குறிப்பிட்டிருந்தது.

``ஊழியர்களுக்கு எதிராக மிரட்டல், பழிவாங்கல்..''

ஆனால், இரண்டு மாதங்கள் கடந்தும் சாம்சங் நிர்வாகம் இதுவரை எந்த பதிலும் கொடுக்கவில்லை. இன்னும் ஒருவாரம்... இன்னும் ஒருவாரம் எனத் தொடர்ந்து காலக்கெடுவை நீட்டிக்கொண்டே செல்கிறது. சாம்சங் நிர்வாகம் Samsung Employee Federation எனும் ஒரு சங்கத்தை அமைத்து, அதன் மூலம் சாம்சங் தொழிலாளர்கள் சங்க உறுப்பினர்களை மிரட்டுவது, பழிவாங்குவது என ஊழியர்களுக்கு எதிரான செயல்களில் ஈடுபடுகிறது. போராட்டத்தின் போது கைது செய்யப்பட்ட 11 ஊழியர்கள் உள்பட 35 ஊழியர்களுக்கு ஷோகாஸ் நோட்டீஸ் கொடுத்திருக்கிறார்கள்.

சாம்சங் நிர்வாகத்தின் பணிச் சுமையால், பழிவாங்கும் செயல்பாடுகளால் சிஐடியு-வின் உறுப்பினரான சாம்சங் ஊழியர் ஒருவர் தற்கொலை முயற்சிக்கூட செய்திருக்கிறார். இது தொடர்பாக காவல் நிலையத்தில் புகாரும் பதிவு செய்யப்பட்டிருக்கிறது.

இந்த விவகாரம் தொடர்பாக சில தினங்களுக்கு முன்பு தொழிலாளர் நலத்துறை அமைச்சர் சி.வி.கணேஷிடம் தொலைபேசி வழியாகப் பேசியபோது, `இதை கவனித்துக்கொள்கிறேன்... பார்த்துக்கொள்ளலாம்' என்றுமட்டும்தான் தெரிவித்தார். எனவே, சாம்சங் நிர்வாகத்தின் தொடர் பழிவாங்கும் செயல்பாடுகளாலும், எங்கள் கோரிக்கைகளை விரைவில் நிறைவேற்றித் தரவேண்டும் என்றும் நிறுவனத்துக்குள்ளேயே நாளை உண்ணாவிரதப் போராட்டம் அறிவித்திருக்கிறோம்." என்றார்.