Ambedkar: ``டூரிஸ்ட் கைடு வேலை பார்க்காமல் உள்துறை பொறுப்பை பாருங்கள்!" - அமித் ஷாவை சாடும் உதயநிதி

மத்திய உள்துறை அமைச்சர் அமித் ஷா, ``இந்த காலத்தில் அம்பேத்கர், அம்பேத்கர், அம்பேத்கர்... என அவரின் பெயரைக் கோஷமிடுவது ஃபேஷனாகிவிட்டது. இத்தனை முறை அம்பேத்கர் பெயரைக் கூறியதற்குப் பகவானின் பெயரைக் கூறியிருந்தால் அவர்களுக்குச் சொர்க்கத்திலாவது இடம் கிடைத்திருக்கும். அம்பேத்கரின் பெயரை காங்கிரஸ் எடுத்துக்கொள்வதில் மகிழ்ச்சிதான். ஆனால், அவரின் உண்மையான உணர்வுகள் குறித்தும் பேச வேண்டும்." என்று நாடாளுமன்றத்தில் பேசியிருப்பது பெரும் விவாதப்பொருளாக வெடித்திருக்கிறது.

இதில், ``மனுஸ்மிருதியை நம்புபவர்கள் கண்டிப்பாக அம்பேத்கருடன் முரண்படுவதில் ஆச்சர்யமில்லை." என ராகுல் காந்தியும், ``அதிக பாவங்கள் செய்பவர்கள்தான் புண்ணியத்தைப் பற்றிக் கவலைப்பட வேண்டும்." என தமிழக முதல்வர் ஸ்டாலினும் பா.ஜ.க-வை சாட, மற்ற எதிர்க்கட்சித் தலைவர்களும் பா.ஜ.க-வுக்கெதிராக தங்களின் எதிர்ப்பை பதிவுசெய்து வருகின்றனர். மறுபக்கம், அம்பேத்கருக்கெதிராக காங்கிரஸ் செய்த பாவங்கள் என பட்டியலிட்டு பிரதமர் மோடியும் விமர்சித்து வருகிறார்.

இந்த நிலையில், தமிழக துணை முதலமைச்சர் உதயநிதி ஸ்டாலின், `` `எதற்கெடுத்தாலும் அம்பேத்கர்.. அம்பேத்கர்.. என்று சொல்கிறார்கள்' என ஒன்றிய உள்துறை அமைச்சர் அமித் ஷா அவதூறாகப் பேசியிருப்பதை வன்மையாகக் கண்டிக்கிறோம். எப்படி எங்கே செல்லலாம் என டூரிஸ்ட் கைடு வேலை பார்ப்பதற்குப் பதிலாக, உள்துறை அமைச்சர் பொறுப்பை அமித் ஷா முதலில் சரிவர கவனிக்கட்டும்.

அண்ணல் அம்பேத்கர் தந்த அரசியலமைப்பு சட்டத்தை எப்படியாவது சிதைக்கலாம் என்று கங்கணம் கட்டி அலையும் பாசிஸ்ட்டுகளுக்கு, அம்பேத்கரின் பெயரைக் கேட்டாலே எரிச்சல் வருகிறது என்றால், இன்னும் பல நூறுமுறை அண்ணலின் பெயரை குரல் உயர்த்திச் சொல்வோம்! வாழ்க அம்பேத்கர்! அம்பேத்கர் புகழ் ஓங்கட்டும்!" என்று எக்ஸ் தளத்தில் சாடியிருக்கிறார்.

நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...

https://bit.ly/MaperumSabaithanil