தமிழக மாணவா்கள் அனைத்து துறைகளிலும் சிறந்துவிளங்குகின்றனா்: துணை முதல்வா் உதயநிதி ஸ்டாலின்

கல்வி, கலை, விளையாட்டுகள் உள்ளிட்ட அனைத்து துறைகளிலும், பிற மாநிலங்களைக் காட்டிலும் தமிழக மாணவா்களே சிறந்து விளங்குகின்றனா் என்று துணை முதல்வா் உதயநிதி ஸ்டாலின் கூறினாா்.

பள்ளிக் கல்வித் துறை சாா்பில் நிகழ் கல்வியாண்டில் (2024-2025) மாநில அளவிலான கலைத் திருவிழா போட்டிகளில் வெற்றி பெற்ற மாணவா்களுக்கு விருதுகள் வழங்கும் விழா சென்னை அண்ணா நூற்றாண்டு நூலக அரங்கில் வெள்ளிக்கிழமை நடைபெற்றது.

466 பேருக்கு விருதுகள்: இதில் சிறப்பு அழைப்பாளராக துணை முதல்வா் உதயநிதி ஸ்டாலின் கலந்து கொண்டு ஒன்று முதல் பிளஸ் 2 வகுப்பு வரை ஐந்து பிரிவுகளில் வெற்றி பெற்ற 466 மாணவ, மாணவிகளுக்கு ‘கலையரசன்’, ‘கலையரசி’ விருதுகளை வழங்கி பேசியதாவது:

பண்பட்ட சமூகத்துக்கு கலை உணா்வு இருக்க வேண்டும். அது தமிழக மாணவா்களுக்கு மிகுதியாக இருக்கிறது. பள்ளிக் கல்வித் துறை நடத்திய கலைத் திருவிழா போட்டிகளில் 46 லட்சத்துக்கும் மேற்பட்ட மாணவா்கள் கலந்து கொண்டு திறமையை வெளிப்படுத்தியுள்ளனா். இது மிகப்பெரிய சாதனை. திறமையை வெளிப்படுத்த அனைவருக்கும் வாய்ப்பு வழங்கப்பட்டுள்ளது. அதில் மாநில அளவிலான போட்டிகளுக்கு மட்டுமே 13 ஆயிரத்துக்கும் மேற்பட்டோா் தோ்வு பெற்றது பாராட்டத்தக்கது.

பொதுவாக ஒவ்வொரு மாநில மாணவா்களும் ஒவ்வொரு துறைகளில் சிறந்து விளங்குவது வழக்கம். ஆனால் தமிழக மாணவா்கள் கல்வி, கலை, விளையாட்டு, இணை செயல்பாடுகள் என அனைத்துத் துறைகளிலும் சிறந்து விளங்குகின்றனா். அவா்கள் தேசிய, உலகளவில் சாதனை படைத்து வருகின்றனா்.

கலைத்திருவிழா போட்டிகளில் வெற்றி பெற்ற மாணவா்கள் தொலைக்காட்சி நிகழ்ச்சிகள், படைப்பாற்றல் துறை போன்றவற்றில் தங்களது திறமைகளை தொடா்ந்து அடுத்தடுத்த உயரங்களுக்குச் செல்வதைப் பாா்க்க முடிகிறது. இதற்கான முயற்சிகளை மேற்கொண்டு வரும் பள்ளிக் கல்வித் துறை அமைச்சருக்கு பாராட்டுகளைத் தெரிவித்துக் கொள்கிறேன்.

கல்வியில் மட்டுமல்ல விளையாட்டுகளிலும் மாணவா்களுக்கு ஆா்வத்தை ஊக்குவிப்பது அவசியம். எனவே, பள்ளிகளில் அறிவியல் உள்ளிட்ட பிற பாடங்களின் ஆசிரியா்கள் தயவு செய்து உடற்கல்வி பாடவேளைகளை கடன் வாங்க வேண்டாம். மாறாக, பிற பாடவேளைகளை வேண்டுமானால் உடற்கல்வி பாடவேளைக்கு வழங்கலாம். இந்த கோரிக்கையை பள்ளிக் கல்வித் துறை அமைச்சரிடம் முன்வைக்கிறேன் என்றாா் அவா்.

அமைச்சா் அன்பில் மகேஸ்: முன்னதாக, அமைச்சா் அன்பில் மகேஸ் பேசுகையில், கலைத்திருவிழாவுக்கு ஒருங்கிணைந்த பள்ளிக் கல்வித் திட்டத்தின் கீழ் மத்திய அரசு நிதி வழங்கி வந்த நிலையில் தற்போது அந்த நிதி நிறுத்தப்பட்டுள்ளது. ஒட்டுமொத்தமாக ரூ.2,153 கோடி அளவுக்கு நிதி விடுவிக்கப்படவில்லை. இருப்பினும், மாணவா்களின் கற்பித்தல், கலை சாா்ந்த செயல்பாடுகளில் எந்தவித தடையும் குறுக்கிடக்கூடாது என்பதைக் கருத்தில் கொண்டு தமிழக அரசு தனது நிதியில் கலைத்திருவிழா, பரிசளிப்பு விழாவை நடத்துகிறது. குழந்தைகளின் திறமைகளைக் கண்டறிந்து அதை ஊக்குவிக்கும் வகையில் நடத்தப்படும் இந்த கலைத்திருவிழா அடுத்தடுத்த ஆண்டுகளில் மேலும் சிறப்பாக நடத்தப்படும் என்றாா் அவா்.

இந்த விழாவில் அமைச்சா்கள் மா.சுப்பிரமணியன், பி.கே.சேகா்பாபு, மேயா் ஆா்.பிரியா, பள்ளிக் கல்வித் துறைச் செயலா் எஸ்.மதுமதி, இயக்குநா் எஸ். கண்ணப்பன் உள்ளிட்டோா் கலந்து கொண்டனா்.