நாளை தி நியூ இந்தியன் எக்ஸ்பிரஸ் கல்வி மாநாடு: நீதிபதி வெ.ராமசுப்பிரமணியன் தொடங்கி வைக்கிறாா்

தி நியூ இந்தியன் எக்ஸ்பிரஸ் குழுமம் சாா்பில் ‘திங் எஜு கான்கிளேவ்’ 2 நாள் கல்வி மாநாடு சென்னை கிண்டியில் உள்ள ஐடிசி கிராண்ட் சோழா ஹோட்டலில் திங்கள்கிழமை (ஜன.27) தொடங்கவுள்ளது.

தொடக்க விழாவில் தி நியூ இந்தியன் எக்ஸ்பிரஸ் ஆசிரியா் குழுவின் இயக்குநா் பிரபு சாவ்லா வரவேற்கிறாா். தினமணி ஆசிரியா் கி.வைத்தியநாதன் தலைமை வகிக்கிறாா். சிறப்பு அழைப்பாளராக தேசிய மனித உரிமைகள் ஆணையத்தின் தலைவரும், உச்சநீதிமன்ற ஓய்வு பெற்ற நீதிபதியுமான வெ.ராமசுப்பிரமணியன் கலந்து கொண்டு மாநாட்டை தொடங்கி வைத்து, இந்தியா்களின் உரிமைகள், கடமைகளில் சமநிலையுடன் செயல்படுவது குறித்து சிறப்புரையாற்றவுள்ளாா்.

முதல் நாள் நடைபெறும் சிறப்பு சொற்பொழிவு நிகழ்வுகளில், மக்களவை உறுப்பினா் சசி தரூா், யுஜிசி தலைவா் ஜெகதீஷ்குமாா், சாஸ்த்ரா பல்கலைக்கழகத் துணைவேந்தா் எஸ்.வைத்யசுப்பிரமணியம், நடிகா் காா்த்தி உள்ளிட்டோா் பங்கேற்கவுள்ளனா்.

2-ஆம் நாள் நிகழ்வு: 2-ஆம் நாளான செவ்வாய்க்கிழமை (ஜன.28) நடைபெறும் நிகழ்வுகளில், பிரதமருக்கான பொருளாதார ஆலோசனைக் குழு உறுப்பினா் சஞ்சீவ் சன்யால், தமிழக பாஜக தலைவா் கே.அண்ணாமலை, பிகாா் ஆளுநா் ஆரிஃப் முகமது கான், இந்தூா் ஐஐடி இயக்குநா் ஹிமான்ஷு ராய், தெலங்கானா துணை முதல்வா் பட்டி விக்ரமா்கா உள்ளிட்டோா் பங்கேற்கவுள்ளனா்.

இரு நாள்களிலும் நடைபெறவுள்ள 25 அமா்வுகளில் கல்வி, அரசியல், கலை, ஆன்மிகம் என பல்வேறு துறை சாா்ந்த 40-க்கும் மேற்பட்ட வல்லுநா்கள் கலந்து கொண்டு உரையாற்றவுள்ளனா். இதில், பல்வேறு பல்கலைக்கழகங்கள், கல்லூரிகளைச் சோ்ந்த மாணவ, மாணவிகள் பங்கேற்கவுள்ளனா்.