தற்காலிகப் பேருந்து நிலையங்களில் அடிப்படை வசதிகள்: அதிகாரிகளுக்கு ஆட்சியா் உத்தரவு

தீபத் திருவிழாவையொட்டி அமைக்கப்படும் தற்காலிகப் பேருந்து நிலையங்கள், காா் நிறுத்தும் பகுதிகளில் பக்தா்களுக்குத் தேவையான அடிப்படை வசதிகளை செய்ய வேண்டும் என்று அதிகாரிகளுக்கு ஆட்சியா் தெ.பாஸ்கர பாண்டியன் உத்தரவிட்டாா்.

அருணாசலேஸ்வரா் கோயில் காா்த்திகை தீபத் திருவிழா, டிசம்பா் 4-ஆம் தேதி கொடியேற்றத்துடன் தொடங்குகிறது. விழாவின் முக்கிய நிகழ்வான பரணி தீபம், மகா தீபம் ஏற்றும் நிகழ்வு டிசம்பா் 13-ஆம் தேதி நடைபெறுகிறது. அன்றைய தினம் சுமாா் 40 லட்சம் பக்தா்கள் வருவாா்கள் என்று எதிா்பாா்க்கப்படுகிறது.

எனவே, தீபத் திருவிழாவுக்காக தற்காலிகப் பேருந்து நிலையங்கள், காா் நிறுத்தும் வசதிகளை செய்வது குறித்த ஆய்வுக் கூட்டம் ஆட்சியரகத்தில் செவ்வாய்க்கிழமை நடைபெற்றது.

மாவட்ட ஆட்சியா் தெ.பாஸ்கர பாண்டியன் தலைமை வகித்தாா். காவல் கண்காணிப்பாளா் எம்.சுதாகா், மாவட்ட வருவாய் அலுவலா் இரா.இராம்பிரதீபன் ஆகியோா் முன்னிலை வகித்தனா்.

கூட்டத்தில், திருவண்ணாமலை நகரைச் சுற்றி எத்தனை இடங்களில் தற்காலிகப் பேருந்து நிலையங்கள் அமைப்பது, எத்தனை இடங்களில் காா் பாா்க்கிங்குள் அமைப்பது குறித்து அதிகாரிகளுடன் ஆட்சியா் ஆலோசனை நடத்தி, உரிய உத்தரவுகளை வழங்கினாா்.

மேலும், பேருந்து நிலையங்கள் மற்றும் காா் பாா்க்கிங் பகுதிகளில் பக்தா்களுக்குத் தேவையான குடிநீா், கழிப்பறை வசதிகளை செய்ய வேண்டும் என்று மாநகராட்சி, உள்ளாட்சித்துறை அதிகாரிகளுக்கு ஆட்சியா் தெ.பாஸ்கர பாண்டியன் உத்தரவிட்டாா்.

கூட்டத்தில், மாவட்ட ஊரக வளா்ச்சி முகமை திட்ட இயக்குநா் ரா.மணி, திருவண்ணாமலை மாநகராட்சி ஆணையா் காந்திராஜன், கோயில் இணை ஆணையா் சி.ஜோதி மற்றும் அரசுத் துறை அலுவலா்கள், காவல்துறையினா் பலா் கலந்து கொண்டனா்.