இந்திய தமிழர்களின் கோரிக்கையை இலங்கை பூர்த்தி செய்யும் என நம்புகிறேன்: பிரதமர் ம...
தாம்பரம் மாநகராட்சியில் 2025-2026 நிதியாண்டுக்கான பட்ஜெட் வியாழக்கிழமை தாக்கல் செய்யப்பட்டது. இதில் ரூ. 1,139.30 கோடி வருவாய் மற்றும் ரூ. 1,088.69 கோடி செலவுகளுடன் உபரி வருவாய் ரூ.50.61 கோடி மதிப்பீட்டில் பட்ஜெட் தாக்கல் செய்யப்பட்டது.
தாம்பரம் மாநகராட்சி அலுவலகத்தில் வியாழக்கிழமை நடைபெற்ற பட்ஜெட் கூட்டத் தொடரில் வரி வசூல் குழுத் தலைவா் ஏ.ரமணி பட்ஜெட் ஆவணத்தை மேயா் வசந்த குமாரியிடம் வழங்கினாா்.
பட்ஜெட்டின் முக்கிய அம்சங்கள்: பசுமை ஆற்றலுக்கு முன்னுரிமை அளித்து, மின் கட்டணச் செலவைக் குறைக்க மாநகராட்சிக் கட்டங்களின் கூரைகளில் சோலாா் பேனல்கள் அமைக்க ரூ.3 கோடி ஒதுக்கப்பட்டுள்ளது. குடிமைப் பணிகள் மற்றும் உயா்கல்வி பயிலும் மாணவா்களுக்கு பயனளிக்கும் வகையில், ரூ.3 கோடி செலவில் உயா் தொழில்நுட்ப நூலகம் அமைக்கப்பட உள்ளது.
மக்களை உடற்பயிற்சிக்கு ஊக்குவிக்கும் வகையில் ரூ.3.74 கோடியில் பூங்காக்களில் உடற்பயிற்சி கூடங்கள், மேற்குத் தாம்பரம் சண்முகம் சாலையை ஸ்மாா்ட் சாலையாக மாற்ற ரூ.10 கோடி ஒதுக்கப்பட்டுள்ளது. வெள்ள பாதிப்பை தடுக்கும் விதமாக ரூ. 35 கோடியில் நிலத்தடி கழிவுநீா் மற்றும் குடிநீா் குழாய்கள் பதிக்கும் பணிகள் மேற்கொள்ளப்படும். அதன்பின், சாலைகளை மறுபடியும் அமைக்க ரூ.40 கோடி ஒதுக்கப்பட்டுள்ளது.
கல்வித் துறையில், மாநகராட்சி பள்ளிகளில் ஸ்மாா்ட் வகுப்பறைகள் அமைக்க ரூ.1 கோடி ஒதுக்கப்பட்டுள்ளது. போக்குவரத்து நெறிமுறைகளை மாணவா்களுக்கு விளக்க வலியுறுத்த ரூ.1 கோடி செலவில் போக்குவரத்து பூங்கா, கலை மற்றும் இலக்கிய விழாவை ரூ.3 கோடி செலவில் நடத்தத் திட்டமிடப்பட்டுள்ளது.
வருவாய் அதிகரிக்க திட்டம்: மாநகராட்சியின் வருவாயை அதிகரிக்கும் நோக்கில் ரூ.11 கோடியில் நவீன உணவகம் அமைக்கப்படும். பிரதான ஏரிகளில் நீா் மாசுபடுவதை தடுக்கும் நோக்கில் நீா் மேலாண்மை, தாம்பரம் ஜிஎஸ்டி சாலையில் போக்குவரத்து நெரிசலை தடுக்க பன்னடுக்கு வாகன நிறுத்தம் தலா ரூ.10 கோடி மதிப்பில் அமைக்க திட்டமிடப்பட்டுள்ளது. மாநகராட்சி பகுதிகளில் ரூ.27. 60 கோடி செலவில் குடிநீா் ஆதார புனரமைப்புப்பணிகள் மேற்கொள்ள திட்டமிடப்பட்டுள்ளதாக பட்ஜெட்டில் குறிப்பிடப்பட்டுள்ளது. கூட்டத்தில் தாம்பரம் மாநகராட்சி ஆணையா் பாலச்சந்தா், துணை மேயா் ஜி.காமராஜ் உள்ளிட்டோா் பங்கேற்றனா்.
அதிமுக விமா்சனம்: பட்ஜெட் கூட்டத்தொடருக்கு பின் அதிமுக மன்ற உறுப்பினா் சேலையூா் சங்கா் செய்தியாளரிடம் கூறிகையில், தாம்பரம் மாநகராட்சியாகத் தரம் உயா்த்தப்பட்ட பின்னா் கடந்த 3 ஆண்டுகளில் 30 சதவீதம் கூட பணிகள் நிறைவடையவில்லை. மக்கள் பணிகளைச் செயல்படுத்தாத பட்ஜெட்டாக உள்ளது என்றாா்.
