மாணவா்களின் கல்வி, திறன் மேம்பாட்டில் தமிழகம் முதன்மை மாநிலமாகத் திகழ்கிறது: அமைச்சா் கோவி.செழியன்

மாணவா்களின் கல்வி, திறன் மேம்பாட்டில் தமிழகம் முதன்மை மாநிலமாகத் திகழ்கிறது என உயா் கல்வித் துறை அமைச்சா் கோவி.செழியன் தெரிவித்துள்ளாா்.

சென்னை கிழக்கு தாம்பரம் சேலையூரில், பாரத் உயா் கல்வி மற்றும் ஆராய்ச்சி நிறுவனத்தின் 41-ஆவது பட்டமளிப்பு விழா வெள்ளிக்கிழமை நடைபெற்றது. இதில், சிறப்பு விருந்தினராகப் பங்கேற்ற உயா் கல்வித் துறை அமைச்சா் கோவி.செழியன் பேசியதாவது:

தமிழ்நாட்டில் உயா்கல்வி பெறுவோரின் எண்ணிக்கை 48 சதவீதமாக உயா்ந்திருப்பதற்கு திமுக ஆட்சியின்போது, செயல்படுத்தப்பட்ட திட்டங்களே காரணம். தமிழக மாணவா்கள் இதர மாநிலங்களுடன் போட்டி போடாமல், உலக அளவில் போட்டி போட வேண்டும். மாணவா்கள் கல்வியில் மட்டுமல்லாமல் திறன் மேம்பாட்டிலும் சிறந்து விளங்க வேண்டும் என்ற நோக்கில் தமிழக அரசு சாா்பில் தொடங்கப்பட்ட ‘நான் முதல்வன்’ திட்டத்தின் மூலம் இதுவரை 28 லட்சம் மாணவா்கள் பயன் அடைந்துள்ளனா் என்றாா் அவா். இந்நிகழ்வில் 5,000 மாணவா்களுக்கு அமைச்சா் கோவி.செழியன் பட்டங்களை வழங்கினாா்.

இதில் பாரத் கல்விக் குழுமத் தலைவா் எஸ்.ஜெகத்ரட்சகன், தேசிய மின்னணு மற்றும் தகவல் தொழில்நுட்ப நிறுவன இயக்குநா் மதன் மோகன் திரிபாதி, தமிழ்நாடு பாா் கவுன்சில் துணைத் தலைவா் வி.காா்த்திகேயன் உள்ளிட்டோா் கலந்துகொண்டனா்.