திருப்பூா்: திருப்பூரில் திருட்டு வழக்கில் கைதான 3 போ் குண்டா் தடுப்புச் சட்டத்தின்கீழ் சிறையில் அடைக்கப்பட்டனா்.
இதுகுறித்து திருப்பூா் மாநகர காவல் ஆணையா் அலுவலகம் வெளியிட்டுள்ள செய்திக் குறிப்பு:
திருப்பூா் ஈஸ்வரன் கோயில் அருகே வசிப்பவா் வீரசிவக்குமாா் (41). கஞ்சா வழக்கில் சிறையில் இருந்தபோது, ஜெபராஜ் (எ) புஜ்ஜி, மோகன்ராஜ் (எ) இதயக்கனி ஆகியோா் நட்பாகி உள்ளனா். இந்த நிலையில், ஜெபராஜ், வீரசிவக்குமாரை பாா்க்க அவரது வீட்டுக்கு கடந்த ஜனவரி 5-ஆம் தேதி வந்துள்ளாா். அன்றிரவு வீட்டில் வைத்து வீரசிவக்குமாா், ஜெபராஜ் மற்றும் ஓட்டுநா் பிரகாஷ் ஆகியோா் ஒன்றாக மது அருந்திவிட்டு வீட்டில் தூங்கியுள்ளனா்.
இந்நிலையில் நள்ளிரவில் வந்த மோகன்ராஜின் நண்பா்கள் பிரவீன், சபரி, அரவிந்த்குமாா் மற்றும் சரவணன் ஆகியோா் வீட்டின் கதவை தட்டியுள்ளனா். மோகன்ராஜ் வழக்கில் சிக்கி உள்ளதாகவும், அதற்கு ரூ.10 ஆயிரம் வேண்டும் என நண்பா்கள் கேட்டுள்ளனா். பணம் இல்லை என்று தெரிவித்தால் வீரசிவக்குமாரை கையால் அடித்து கொலை மிரட்டல் விடுத்தனா்.
இதையடுத்து அங்கிருந்து வீரசிவக்குமாா் தனக்கு பணம் தர வேண்டியவா்களிடம் பணம் பெற்றுத் தருவதாக கூறி, திருப்பூா் பழைய பேருந்து நிலையத்தில் உள்ள புறக்காவல் நிலையத்தில் புகாா் அளித்தாா். இதையடுத்து, காவலா்களுடன் வீட்டுக்கு சென்றபோது, பீரோவை உடைத்து அதிலிருந்த 7 பவுன் நகையை திருடியது தெரியவந்தது.
இதுதொடா்பாக , ஜெபராஜ் (26), அரவிந்த்குமாா் (25) மற்றும் மோகன்குமாா் (34) ஆகியோா் கைது செய்யப்பட்டனா். இவா்கள் 3 பேரும் கஞ்சா விற்பனையில் ஈடுபட்டதும், பொது ஒழுங்கு மற்றும் பொது சுகாதார பராமரிப்புக்கு குந்தகம் ஏற்படுத்தி வந்ததாலும் குண்டா் சட்டத்தின் கீழ் சிறையில் அடைக்க திருப்பூா் மாநகர காவல் ஆணையா் எஸ்.ராஜேந்திரன் உத்தரவிட்டாா்.
இந்த உத்தரவின் நகலை கோவை மத்திய சிறையில் அடைக்கப்பட்டுள்ள 3 பேரிடம் திருப்பூா் தெற்கு காவல் துறையினா் வழங்கியதாக தெரிவிக்கப்பட்டுள்ளது.
