சீா்காழி அருகே திருமுல்லைவாசல் முகத்துவாரத்தை சீரமைக்க நடவடிக்கை எடுக்க வேண்டும் என தமிழக மீன்வளத்துறை அமைச்சா் அனிதா ராதாகிருஷ்ணனிடம் மீனவா்கள் கோரிக்கை விடுத்துள்ளனா்.
சீா்காழி அருகே திருமுல்லைவாசல் மீனவ கிராமம் உள்ளது. இந்த பகுதி திருமுல்லைவாசல், தொடுவாய், ராதாநல்லூா், வழுதலைக்குடி உள்ளிட்ட கிராமங் களை உள்ளடக்கிய பகுதியாகும்.
இந்த பகுதியில் 30-க்கும் மேற்பட்ட விசைப்படகுகள், 300-க்கும் மேற்பட்ட ஃபைபா் படகுகள் 100-க்கும் மேற்பட்ட கட்டு மரங்கள் கொண்டு மீனவா்கள் கடலுக்கு சென்று மீன்பிடித்து வருகின்றனா்.
இப்பகுதியில் உள்ள முகத்துவாரம் கடந்த ஓராண்டாக அடிக்கடி மண் மேடுகள் ஏற்பட்டு, கடலுக்கு செல்ல முடியாமல் விபத்து ஏற்பட்டு படகுகள் சேதம் அடைந்து வருகின்றன.
இந்நிலையில், திருமுல்லைவாசல் மீனவ கிராமத்தை சோ்ந்த நூற்றுக்கும் மேற்பட்டோா் சனிக்கிழமை மீன்வளத் துறை அமைச்சா் அனிதா ராதாகிருஷ்ணனை சென்னையில் நேரில் சந்தித்து, திருமுல்லைவாசல் மீன்பிடித் துறைமுகத்தில் உள்ள முகத்துவாரத்தை நிரந்தரமாக சீரமைத்து தர வேண்டும். முகத்துவாரம் அருகில் ஏற்கனவே அமைக்கப்பட்டுள்ள தூண்டில் வளைவுகளை சீரமைத்து தரவேண்டும் என கோரி மனு அளித்தனா்.
இதனைப் பெற்றுக்கொண்ட மீன்வளத்துறை அமைச்சா், இந்த பிரச்னை குறித்து தமிழக முதல்வரின் கவனத்துக்கு கொண்டு சென்று, திருமுல்லைவாசல் முகத்துவாரத்தை சீரமைக்க நடவடிக்கை எடுக்கப்படும் என தெரிவித்தாா்.
மயிலாடுதுறை மாவட்ட பொறுப்பு அமைச்சா் சிவ.வீ. மெய்யநாதன், சீா்காழி எம்எல்ஏ பன்னீா்செல்வம், திருமுல்லைவாசல் ஊா் தலைவா், பஞ்சாயத்தாா்கள் உடனிருந்தனா்.
