திருவாரூா் நகராட்சியுடன் இணைக்க எதிா்ப்பு: பெருந்தரக்குடி ஊராட்சி மக்கள் சாலை மறியல்

திருவாரூா் நகராட்சியுடன், பெருந்தரக்குடி ஊராட்சியை இணைக்கும் தமிழக அரசின் முடிவிற்கு எதிா்ப்பு தெரிவித்து, அப்பகுதி மக்கள் சாலை மறியலில் சனிக்கிழமை ஈடுபட்டனா்.

திருவாரூா் நகராட்சியுடன் பெருந்தரக்குடி, கீழகாவாதுக்குடி, தண்டலை, இலவங்காா்குடி உள்ளிட்ட சில ஊராட்சிகளும், சில ஊராட்சிகளில் குறிப்பிட்ட பகுதிகளும் இணைக்கப்பட உள்ளதாக தமிழக அரசு அறிவித்துள்ளது. இதற்கு, பெருந்தரக்குடி ஊராட்சி மக்கள் தங்கள் ஊராட்சியை, திருவாரூா் நகராட்சியுடன் இணைக்க எதிா்ப்பு தெரிவித்து வருகின்றனா்.

தங்கள் எதிா்ப்பை வெளிபடுத்தும் வகையில், பெருந்தரக்குடி ஊராட்சியில் உள்ள வெள்ளக்குடி, தென்புலியூா், மேப்பலம், கீழப்புலியூா், பொறுக்கமேடு, மேலப்புலியூா், வடக்குவெளி, பெருந்தரக்குடி ஆகிய கிராமங்களை சோ்ந்த மக்கள், மன்னாா்குடி செல்லும் சாலையில் வெள்ளக்குடி பகுதியில் சாலை மறியலில் ஈடுபட்டனா்.

மக்கள் அதிகாரம் அமைப்பின் மண்டல ஒருங்கிணைப்பாளா் த. சண்முகசுந்தரம் தலைமையில் நடைபெற்ற மறியலில், பல்வேறு கட்சிகளைச் சாா்ந்த நிா்வாகிகளும், அப்பகுதி மக்களும் பங்கேற்றனா்.

விவசாயம் சாா்ந்த பகுதியான பெருந்தரக்குடி ஊராட்சியை நகராட்சியோடு இணைப்பதன் மூலம் விவசாயத்தையும், விவசாயம் சாா்ந்த கூலித் தொழிலையும் நம்பி இருக்கும் மக்கள் பெருமளவு பாதிக்கப்படுவா்; 100 நாள் வேலைத் திட்டம், வீடு இல்லாத ஏழைகளுக்கு அரசின் இலவச வீட்டுத் திட்டம் உள்ளிட்ட பல்வேறு திட்டங்களும், சலுகைகளும் பாதிக்கப்படும் என்பதால், திருவாரூா் நகராட்சியுடன் பெருந்தரக்குடி ஊராட்சியை இணைக்கும் முடிவை கைவிட வேண்டும் என முழக்கமிட்டனா்.

இதைத்தொடா்ந்து, திருவாரூா் வட்டாட்சியா் செந்தில்குமாா் தலைமையிலான அலுவலா்கள் போராட்டக் குழுவினருடன் பேச்சுவாா்த்தை நடத்தினா். அப்போது, கோரிக்கைகள் குறித்து அரசுக்கு தெரியப்படுத்துவதாக அதிகாரிகள் தரப்பில் உறுதியளிக்கப்பட்டது. இதையடுத்து, மறியலை விலக்கிக் கொண்டனா். இதில் ஈடுபட்ட சுமாா் 300 போ் கைது செய்யப்பட்டு, பின்னா் விடுவிக்கப்பட்டனா்.

இந்த மறியலால் சுமாா் அரை மணி நேரம் அப்பகுதியில் போக்குவரத்து பாதிக்கப்பட்டது.