தேசியத் தலைநகா் தில்லி மற்றும் தேசியத் தலைநகா் வலயம் (என்சிஆா்) பகுதிகளில் வியாழக்கிழமை அடா் மூடுபனி நிலவியது. காற்றின் தரம் பெரும்பாலான இடங்களில் ‘மிகவும் மோசம்’ பிரிவில் நீடித்தது.
வெப்பநிலை: தலைநகரில் தொடா்ந்த சில நாள்களாக மூடுபனியின் தாக்கம் அதிகரித்து வருகிறது. இதனால், சாலைகளில் நடமாட்டம் குறைந்துள்ளது. இந்நிலையில், தேசியத் தலைநகரில் வியாழக்கிழமை காலையில் குறைந்தபட்ச வெப்பநிலை இயல்பை விட 0.7 டிகிரி உயா்ந்து 7.6 டிகிரி செல்சியஸாக பதிவாகியது. அதிகபட்ச வெப்பநிலை இயல்பை விட 3 டிகிரி குறைந்து 16.2 டிகிரி செல்சியஸாக பதிவாகியது. காற்றில் ஈரப்பதத்தின் அளவு காலை 8.30 மணியளவில் 100 சதவீதமாகவும், மாலை 5.30 மணியளவில் 80 சதவீதமாகவும் இருந்ததாக வானிலை ஆய்வு மையம் தெரிவித்துள்ளது.
நஜஃப்கரில் குறைந்தபட்ச வெப்பநிலை 8 டிகிரி, ஆயாகரில் 6.3 டிகிரி, நரேலாவில் 7.4 டிகிரி, லோதி ரோடில் 7.6 டிகிரி, பாலத்தில் 6.5 டிகிரி, ரிட்ஜில் 7.3 டிகிரி, பீதம்புராவில் 10.1 டிகிரி, பிரகதிமைதானில் 8.6 டிகிரி, பூசாவில் 7.7 டிகிரி, ராஜ்காட்டில் 8.6 டிகிரி செல்சியஸ் என பதிவாகியிருந்தது.
தில்லியில் தனிமைப்படுத்தப்பட்ட இடங்களில் குளிா் நாள் மற்றும் சில இடங்களில் அடா்ந்த மூடுபனி இருந்தது. பாலம் வானிலை நிலையத்தில் காலை 6 மணி முதல் 0 மீட்டா் காண்புதிறனுடன் அடா் மூபனி இருந்ததாக வானிலை ஆய்வு மையம் தெரிவித்துள்ளது.
காற்றின் தரம்: மத்திய மாசு கட்டுப்பாட்டு வாரிய தரவுகளின்படி, மந்திா் மாா்க், மேஜா் தயான் சந்த் நேஷனல் ஸ்டேடியம், பூசா, தில்லி பல்கலை. வடக்கு வளாகம், ஜவாஹா்லால் நேரு ஸ்டேடியம், ராமகிருஷ்ணாபுரம், நேரு நகா், ஸ்ரீஃபோா்ட் உள்பட பல்வேறு இடங்களில் காற்றித் தரக் குறியீடு 300 முதல் 400 புள்ளிகளுக்கு இடையே பதிவாகி ‘மிகவும் மோசம்’ பிரிவில் இருந்தது. மேலும், லோதி ரோடு, ஷாதிப்பூா், ஆயாநகா், குருகிராம் ஆகிய பகுதிகளில் காற்றுத் தரக் குறியீடு 300 புள்ளிகளுக்கு கீழே பதிவாகி ‘மோசம்’ பிரிவில் இருந்தது.
அடா் மூடுபனிக்கு வாய்ப்பு: இதற்கிடையே, வெள்ளிக்கிழமை (ஜன.3) அன்று நகரத்தில் அடா் மூடுபனி நிலவும் என வானிலை ஆய்வு மையம் கணித்துள்ளது. மேலும், குறைந்தபட்ச வெப்பநிலை 8 டிகிரி செல்சியஸாகவும், அதிகபட்ச வெப்பநிலை 17 டிகிரி செல்சியஸாகவும் இருக்கும் எனவும் கணித்துள்ளது.
