துணை முதல்வா் பதவியை முடிவு செய்ய வேண்டியது இபிஎஸ் அல்ல

எனக்கு துணை முதல்வா் பதவி குறித்து முடிவு செய்ய வேண்டியது எடப்பாடி பழனிசாமி இல்லை என்று நீா்வளத் துறை அமைச்சா் துரைமுருகன் தெரிவித்தாா்.

வேலூா் மாவட்டம், காட்பாடியை அடுத்த தேன்பள்ளி பகுதியில் வெள்ளிக்கிழமை நடைபெற்ற ‘உங்களுடன் ஸ்டாலின்’ திட்ட சிறப்பு முகாமில் நீா்வளத்துறை அமைச்சா் துரைமுருகன் நேரில் பாா்வையிட்டு ஆய்வு செய்தாா். மேலும், முகாமில் பயனாளிகளிடம் மனுக்களைப் பெற்று,

சிலருக்கு உடனடி தீா்வுக்கான சான்று வழங்கினாா்.

பின்னா் செய்தியாளா்களிடம் அமைச்சா் துரைமுருகன் பேசியது: 523 வாக்குறுதிகளை கொடுத்த திமுக இதுவரை எத்தனை வாக்குறுதிகளை நிறைவேற்றியுள்ளது என்று எடப்பாடி பழனிசாமி கேள்வி எழுப்பியிருப்பது குறித்து கேட்டதற்கு, கடந்த அதிமுக ஆட்சியில் இவா்கள் எத்தனை வாக்குறுதி கொடுத்தாா்கள், அதில் எத்தனை நிறைவேற்றினாா்கள் என்ற கணக்கையும் சோ்த்து பாா்க்க வேண்டும் என்றாா்.

மூத்த அமைச்சராகவும், திமுக பொதுச் செயலராகவும் உள்ள துரைமுருகனுக்கு துணை முதல்வா் அளிக்காமல் உதயநிதிக்கு துணை முதல்வா் கொடுத்திருப்பது தான் நான்காண்டு சாதனை என எடப்பாடி பழனிசாமி பேசியிருந்தது குறித்து கேட்டதற்கு, அந்தப் பதவியில் நான் இருப்பதா, இல்லையா என்பதை நான் தான் முடிவு செய்ய வேண்டுமே தவிர எடப்பாடி பழனிச்சாமி இல்லை என்றாா்.

முகாமில், துணைமேயா் எம்.சுனில்குமாா், காட்பாடி ஒன்றியக்குழு தலைவா் வேல்முருகன் உள்ளிட்டோா் பங்கேற்றனா்.

--