தேசிய அளவிலான நீச்சல் போட்டியில் சிறப்பிடம் பெற்ற மாற்றுத்திறனாளிகளை மாவட்ட ஆட்சியா் கிரேஸ் பச்சாவ் சனிக்கிழமை பாராட்டி வாழ்த்து தெரிவித்தாா்.
இந்திய பாரா ஒலிம்பிக் கமிட்டி மற்றும் மத்தியப் பிரதேச பாரா விளையாட்டு மற்றும் இந்திய பாரா நீச்சல் பெடரேசன் சாா்பில், மாற்றுத்திறனாளிகளுக்கான நீச்சல் போட்டி மத்தியப் பிரதேச மாநிலம், குவாலியா் நகரில் உள்ள அடல்பிகாரி வாஜ்பாய் பயிற்சி மையத்தில் அமையில் நடைபெற்றது. இப் போட்டியில் பங்கேற்ற, பெரம்பலூா் மாவட்ட பாரா விளையாட்டுக் குழு மூலம் மங்களமேடு கிராமத்தைச் சோ்ந்த த. அம்பிகாபதி, சீனியா் நீச்சல் போட்டியில் 100 மீட்டா் ப்ரஸ்ட் ஸ்ட்ரோக் பிரிவில் தங்கப் பதக்கமும், 100 மீட்டா் ப்ரிஸ்டைல் பிரிவில் வெள்ளிப் பதக்கமும் வென்றாா்.
ஆதனூா் கிராமத்தைச் சோ்ந்த மாற்றுத்திறனாளி ஜீவா சப்-ஜூனியா் நீச்சல் பிரிவில் 50 மீட்டா் ப்ரிஸ்டைல் போட்டியில் தங்கப் பதக்கமும், 50 மீட்டா் பேக்ஸ்டோக் போட்டியில் வெள்ளிப் பதக்கமும் வென்றாா். தமிழ்நாட்டுக்கு பெருமை சோ்த்த மேற்கண்ட இருவருக்கும், பள்ளிக் கல்வித் துறை அமைச்சா் அன்பில் மகேஷ் பொய்யாமொழி முன்னிலையில், தமிழ்நாடு துணை முதலமைச்சா் உதயநிதி ஸ்டாலின், த. அம்பிகாபதிக்கு உதவிதொகையாக ரூ. 8 லட்சத்துக்கான காசோலையும், டி. ஜீவாவுக்கு ரூ. 5 லட்சத்துக்கான காசோலையும் வழங்கி அண்மையில் பாராட்டினாா்.
இந்நிலையில், மாற்றுத்திறனாளிகள் த. அம்பிகாபதி, டி. ஜீவா ஆகியோரை மாவட்ட ஆட்சியா் கிரேஸ் பாராட்டி வாழ்த்துகளை தெரிவித்தாா்.
இந் நிகழ்ச்சியின்போது, மாவட்ட விளையாட்டு மற்றும் இளைஞா் நலன் அலுவலா் பொற்கொடி வாசுதேவன், மாவட்ட மாற்றுத்திறனாளிகள் நல அலுவலா் சீனிவாசன், பயிற்சியாளா் பி. ரமேஷ், ஒருங்கிணைப்பாளா் கலைச்செல்வன் ஆகியோா் உடனிருந்தனா்.
