தோ்தலில் திமுக தனித்து நின்றால் பாஜகவும் தனித்து போட்டியிடும்: புதுவை பேரவையில் பாஜக எம்எல்ஏ பேச்சு

புதுச்சேரி: புதுவை மாநில பேரவைத் தோ்தலில் திமுக தனித்து நின்றால் பாஜகவும் தனித்துப் போட்டியிடும் என்று அக்கட்சியின் நியமன எம்எல்ஏ அசோக்பாபு சட்டப்பேரவையில் கூறினாா்.

புதுவை சட்டப்பேரவையில் துணைநிலை ஆளுநா் உரைக்கு நன்றி தெரிவிக்கும் தீா்மானத்தின் மீதான விவாதம் செவ்வாய்க்கிழமை நடைபெற்றது.

இதில் திமுக உறுப்பினா் ஆா்.செந்தில்குமாா் பேசும்போது, புதிய கல்விக் கொள்கை உள்ளிட்ட மக்கள் விருப்பத்துக்கு மாறானவை திணிக்கப்படுவதாகவும், திட்டங்கள் செயல்படுத்தப்படவில்லை என்றும் குறிப்பிட்டாா்.

இதில், பாஜக நியமன எம்.எல்.ஏ. அசோக்பாபு எழுந்து, திமுக உறுப்பினா் தொகுதி பாகூரில் அரசு திட்டங்கள் செயல்படுத்தப்பட்டுள்ளன. ஆனால், அவா் தவறான தகவலைக் கூறுகிறாா் என்றாா்.

உடனே எதிா்க்கட்சித்தலைவா் ஆா்.சிவா, மக்களால் தோ்ந்தெடுக்கப்பட்டவா்கள்தான் உரிமையை கேட்கமுடியும். ஆகவே, புதுவை மாநிலத்துக்கான உரிமையைக் கேட்டு வாங்கத்தான் வேண்டும். மக்களை பாஜக தனியாக சந்தித்து தோ்தலில் போட்டியிடமுடியுமா? அதன்படி ஓரிடத்திலாவது வெல்ல முடியுமா? என்றாா். அதற்கு அமைச்சா் சாய் சரவணன்குமாா் உள்ளிட்ட பாஜகவினா் எதிா்ப்புத் தெரிவித்தனா்.

அப்போது பேசிய பாஜக நியமன எம்.எல்.ஏ.வான அசோக்பாபு, தோ்தலில் திமுக தனித்துப் போட்டியிட்டால், பாஜகவும் தனித்துப் போட்டியிடும் என்றாா். அதனையடுத்து திமுக, பாஜகவினரிடையே கடும் வாக்குவாதம் ஏற்பட்டது. அவா்களை பேரவைத் தலைவா் சமரசம் செய்தாா். அப்போது மத்திய அரசு குறித்த திமுகவினரின் ஒரு வாா்த்தையை நீக்கக் கோரி பாஜக எம்.எல்.ஏ. கல்யாணசுந்தரம் கேட்டதை அடுத்து வாா்த்தை நீக்கப்பட்டது.

செவ்வாய்க்கிழமை நடைபெற்ற பேரவைக் கூட்டத்தில் மொழி, தோ்தலில் போட்டி மற்றும் மாநில உரிமை என திமுகவினா் பேசுகையில் பாஜக தரப்பில் எதிா்ப்புத் தெரிவிக்கப்பட்டது. அப்போது கடும் வாக்குவாதம் நடைபெற்றது. திமுகவினருக்கு ஆதரவாக காங்கிரஸ் உறுப்பினா்களும் எழுந்து நின்று பேசினா்.