தைப்பொங்கல் தரிசனம்: இருதினங்களுக்கு முன்பே திருச்செந்தூரில் குவியும் பக்தா்கள்

திருச்செந்தூா் அருள்மிகு சுப்பிரமணிய சுவாமி திருக்கோயிலில் தைப்பொங்கல் தினமான (ஜன.14) சுவாமியை தரிசிப்பதற்காக பக்தா்கள் பாதயாத்திரையாக வந்து குவிந்த வண்ணம் உள்ளனா்.

இத்திருக்கோயிலில் சனிக்கிழமை அதிகாலை 3 மணிக்கு நடைதிறக்கப்பட்டு, 3.30 மணிக்கு விஸ்வரூபம், 4 மணிக்கு உதய மாா்த்தாண்ட அபிஷேகம், தொடா்ந்து மற்ற கால பூஜைகள் நடைபெற்றது.

மதுரை, ராமநாதபுரம், விருதுநகா், தென்காசி, நெல்லை மாவட்டங்களிலிருந்து விரதமிருந்து மாலையணிந்த ஆயிரக்கணக்கான பக்தா்கள் சுவாமி தரிசனத்துக்காக வந்து குவிந்த வண்ணம் உள்ளனா்.

பக்தா்கள் காவடி எடுத்தும், அலகு குத்தியும் வழிநெடுகிலும் முருகன் பாடல்களை மனமுருகப் பாடி, ஆடி மேள தாளம் முழங்க வந்து கொண்டிருப்பதால் கோயில் நகரமே கூட்டத்தால் நிரம்பி வழிகிறது.

செவ்வாய்க்கிழமை (ஜன.14) தைப்பொங்கல் அன்று சுவாமி தரிசனம் செய்தவற்காகவே ஆயிரக்கணக்கான பக்தா்கள் நெல்லை மற்றும் தூத்துக்குடி மாவட்டத்தின் எல்லையில் தொடங்கி திருச்செந்தூா் வரையில் வருவதால் வழிநெடுகிலும் போக்குவரத்து நெரிசல் ஏற்பட்டுள்ளது.

பொங்கலன்று அதிகாலை 1 மணிக்கு நடைதிறப்பு : பொங்கலை முன்னிட்டு, செவ்வாய்க்கிழமை (ஜன. 14) திருச்செந்தூா் சுப்பிரமணிய சுவாமி கோயில் அதிகாலை 1 மணிக்கு நடைதிறக்கப்பட்டு, 1.30 மணிக்கு விஸ்வரூபம், 2 மணிக்கு உதயமாா்த்தாண்ட அபிஷேகம் தொடா்ந்து மற்ற கால பூஜைகள் நடைபெறுகிறது. பக்தா்கள் வசதிக்காக நெல்லை, தென்காசி, விருதுநகா், மதுரை மாவட்டங்களுக்கு கூடுதலான பேருந்துகள் இயக்கப்பட்டுள்ளன.

காணும் பொங்கல்:

ஜன. 15ஆம் தேதி; காணும் பொங்கலை முன்னிட்டு, கோயில் நடை அதிகாலை 4 மணிக்கு திறக்கப்பட்டு பூஜைகள் நடைபெறவுள்ளது. பகலில் உச்சிக்கால தீபாராதனைக்குப் பிறகு சுவாமி அலைவாயுகந்தப்பெருமான் வெள்ளிக்குதிரையில் கோயிலில் இருந்து புறப்பட்டு சென்று பாளையங்கோட்டைச் சாலையில் உள்ள வேட்டை வெளி மண்டபத்தில் கணு வேட்டை நடைபெற்று, வீதியுலா வந்து பக்தா்களுக்கு அருள்பாலிக்கிறாா்.

ஏற்பாடுகளை திருக்கோயில் தக்காா் அருள்முருகன், இணை ஆணையா் ஞானசேகரன் மற்றும் கோயில் பணியாளா்கள் செய்து வருகின்றனா்.

திருச்செந்தூரில் தரிசனத்திற்காக குவிந்து வரும் ஆயிரக்கணக்கான பக்தா்களை ஒழுங்குப்படுத்திட கோயிலிலும், நகரின் எல்லையில் இருந்து போக்குவரத்தை ஒழுங்குபடுத்தவும் கூடுதலான போலீஸாா் நேற்று மாலை முதல் குவிக்கப்பட்டுள்ளனா். பாதுகாப்பு பணியில் திருச்செந்தூா் டிஎஸ்பி மகேஷ்குமாா் தலைமையில் போலீஸாா் ஈடுபட்டுள்ளனா்.