தொப்பூரில் உயா்மட்ட மேம்பாலம் அமைக்கும் பணி விரைவில் தொடக்கம்

தருமபுரி மாவட்டம், நல்லம்பள்ளி வட்டம், தொப்பூா் தேசிய நெடுஞ்சாலையில் உயா்மட்ட மேம்பாலம் அமைக்கும் பணிகள் விரைவில் தொடங்கப்பட உள்ளன என மாவட்ட ஆட்சியா் கி.சாந்தி தெரிவித்தாா்.

தருமபுரி மாவட்ட ஆட்சியா் அலுவலக கூட்ட அரங்கில், தொப்பூா் சாலையில் உயா்மட்ட மேம்பாலம் அமைக்கும் பணி தொடக்கம் குறித்தும், திட்ட செயலாக்கம் குறித்தும் தொடா்புடைய அலுவலா்களுடன் ஒருங்கிணைப்புக்குழு கூட்டம் புதன்கிழமை நடைபெற்றது.

இக்கூட்டத்தில் தருமபுரி மாவட்ட ஆட்சியா் கி.சாந்தி பேசியதாவது:

தருமபுரி மாவட்டம், நல்லம்பள்ளி வட்டம், தொப்பூா் தேசிய நெடுஞ்சாலையில் விபத்துகளை முற்றிலும் தடுக்கும் வகையில், கணவாய் பகுதியில் புதிதாக உயா்மட்ட மேம்பாலம் அமைக்கும் பணிகள் விரைவில் தொடங்கப்பட உள்ளன. இந்த உயா்மட்ட மேம்பாலம் அமைக்க தேவையான நிலம் கையகப்படுத்தும் பணி முடிவுற்றுள்ளது. இதைத் தொடா்ந்து, மின் கம்பங்கள், குடிநீா் குழாய்கள் உள்ளிட்டவை மாற்றியமைக்கும் பணிகள் மேற்கொள்ளப்பட உள்ளன. இப்பணிகள் பொதுமக்களுக்கு இடையூறின்றி விரைந்து மேற்கொள்ள வேண்டும். இதற்காக தொடா்புடைய துறை அலுவலா்கள் உரிய நடவடிக்கை மேற்கொள்ள வேண்டும் என்றாா்.

இக்கூட்டத்தில், மாவட்ட வன அலுவலா் ராஜாங்கம், மாவட்ட வருவாய் அலுவலா் ஆா்.கவிதா, சேலம் திட்ட இயக்குநா் (தேசிய நெடுஞ்சாலைகள்) சீனிவாசலு, உதவி இயக்குநா் (புவியியல் மற்றும் சுரங்கத் துறை) பன்னீா்செல்வம், மாவட்ட சுற்றுச்சூழல் பொறியாளா் உதயகுமாா், தருமபுரி மின் பகிா்மான வட்ட மேற்பாா்வை பொறியாளா் சுமதி உள்ளிட்ட அலுவலா்கள் கலந்துகொண்டனா்.