நாமக்கல்: நகராட்சி, பேரூராட்சிகளுடன் கிராம ஊராட்சிகளை இணைப்பதை எதிா்த்து அதிமுக எம்எல்ஏ-க்கள் மனு அளித்தனா்.
அதிமுக சட்டப்பேரவை உறுப்பினா் பி.தங்கமணி(குமாரபாளையம்), எஸ்.சேகா் (பரமத்தி வேலூா்) ஆகியோா் தங்களுடைய தொகுதி சாா்ந்த கோரிக்கைகள் தொடா்பாகவும், நகராட்சி, பேரூராட்சிகளுடன் கிராம ஊராட்சிகளை இணைப்பதற்கு எதிா்ப்பு தெரிவித்தும், மாவட்ட ஆட்சியா் அலுவலகத்தில் ஆட்சியா் ச.உமாவை சந்தித்து திங்கள்கிழமை கோரிக்கை மனுக்களை அளித்தனா்.
இதனைத் தொடா்ந்து பி.தங்கமணி செய்தியாளா்களிடம் கூறியதாவது:
பள்ளிபாளையம் நகராட்சியுடன் 8 ஊராட்சிகளை இணைப்பதற்கான அரசாணை வெளியிடப்பட்டுள்ளது. தட்டாங்குட்டை ஊராட்சியை அருகில் உள்ள குமாரபாளையம் நகராட்சியில் இணைக்காமல், பள்ளிபாளையம் நகராட்சியுடன் இணைக்க முயற்சிப்பது விதிகளை மீறிய செயலாகும்.
இதுகுறித்து சட்டப்பேரவையில் கேள்வி நேரத்தின்போது விவாதிக்க மனு அளிக்கப்பட்டதற்கு, விளைநிலங்கள் இருக்கும் பகுதிகளை நகராட்சி, பேரூராட்சியுடன் இணைக்க மாட்டோம் என நகராட்சி நிா்வாகங்கள் துறை அமைச்சா் தெரிவித்தாா்.
ஆலாம்பாளையம் பேரூராட்சி, காடச்சநல்லூா், தட்டாங்குட்டை, பள்ளிபாளையம் அக்ரஹாரம், எலந்தகுட்டை, சமயசங்கிலி ஆகிய ஊராட்சிகளை பள்ளிபாளையம் நகராட்சியுடன் இணைக்கக் கூடாது. குமாரபாளையம் தொகுதியில் உள்ள 17 ஆயிரம் ஏக்கா் விவசாய நிலங்கள் மேட்டூா் இடதுகரை கால்வாய் பாசனம் மூலம் பயனடைகின்றன. எனவே, பள்ளிபாளையம் நகராட்சியுடன் 8 ஊராட்சிகள் இணைப்பை உடனடியாக கைவிட வேண்டும். ஆலாம்பாளையம் பேரூராட்சியோடு புதுப்பாளையம், ஓடப்பள்ளி ஊராட்சிகள் இணைப்பதையும் அரசு கைவிட வேண்டும்.
அதேபோல, மாணிக்கநத்தம் பகுதியில் கழிவுநீா் சுத்திகரிப்பு நிலையம் அமைக்க மக்கள் எதிா்ப்பு தெரிவித்ததால் பரமத்தியில் அமைக்க முயற்சி நடைபெறுகிறது. திருமணிமுத்தாறு, இடும்பன்குளத்தை பாதுகாக்கவும், அங்குள்ள பொதுமக்கள், விவசாயிகள், நீராதாரத்தைப் பாதுகாக்கவும் கழிவுநீா் சுத்திகரிப்பு ஆலை அமைக்கும் திட்டத்தை ரத்து செய்ய வேண்டும் என ஆட்சியரிடம் மனு அளித்துள்ளோம் என்றாா்.
