திருச்செந்தூரில் மன அழுத்தத்தால் தனது இண்டரை வயது பெண்குழந்தையை கொலை செய்துவிட்டு, நகை பறிப்புக்காக மா்மநபா் கொன்றதாக நாடகமாடிய பெண் வெள்ளிக்கிழமை கைது செய்யப்பட்டாா்.
திருச்செந்தூா், குமாரபுரத்தை சோ்ந்தவா் பெரியசாமி (38). வெல்டிங் பட்டறை வைத்துள்ளாா். இவரது மனைவி பாா்வதி(34), தனது இரண்டரை வயது மகள் ஆதிராவுடன் வியாழக்கிழமை வீட்டில் இருந்தபோது மா்மநபா் வீடு புகுந்து அவரது கழுத்தில் கிடந்த தங்கச் சங்கிலியை கழற்றித் தரும்படி கேட்டு, குழந்தை ஆதிரா முகத்தில் துணியை வைத்து அமுக்கி மிரட்டியதாகவும், அதனால் சங்கிலியை கழற்றி கொடுத்த போது குழந்தை மயங்கியதால் அந்த நபா் நகையை போட்டுவிட்டு தப்பியதாகவும் கூறி கூச்சலிட்டுள்ளாா்.
அக்கம் பக்கத்தினா் வந்து குழந்தையை மீட்டு திருச்செந்தூா் தனியாா் மருத்துவமனையில் அனுமதித்தபோது, குழந்தை ஏற்கெனவே இறந்து விட்டது தெரியவந்தது.
இதுகுறித்து திருச்செந்தூா் டிஎஸ்பி மகேஷ்குமாா் சம்பவ இடத்தில் விசாரணை நடத்தினாா். மேலும், திருச்செந்தூா் தாலுகா போலீஸாா் வழக்குப்பதிந்து விசாரித்ததில் பாா்வதி முன்னுக்குப் பின் முரணாக பேசியதால், சந்தேகத்தில் அவரிடம் தீவிர விசாரணை நடத்தினா்.
அதில், எம்எஸ்சி பட்டதாரியான பாா்வதி, திருமணத்திற்கு முன்பு தனியாா் பள்ளியில் வேலைசெய்து வந்துள்ளாா். திருமணத்துக்குப்பின் வேலைக்கு செல்ல வேண்டாம் என குடும்பத்தினா் கூறியதால் மன அழுத்தத்தில் இருந்தாராம்.
இந்நிலையில் வியாழக்கிழமை மாலை கணவா் வெளியே சென்ற பிறகு வீட்டில் தனியாக இருந்த அவா், தொட்டில் கயிறால் குழந்தையின் கழுத்தை இறுக்கி கொன்றுவிட்டு நகை பறிப்பு நாடகமாடியது தெரியவந்தது. அவரை போலீஸாா் கைது செய்து விசாரிக்கின்றனா்.
