நல்லூரில் குடியிருப்புகள் கட்டுமானப் பணி: விரைந்து முடிக்க ஆட்சியா் அறிவுறுத்தல்

கடலூா் மாவட்டம், நல்லூா் ஊராட்சி ஒன்றியப் பகுதிகளில் நடைபெற்று வரும் குடியிருப்புகள் கட்டுமானப் பணிகளை விரைந்து முடிக்க வேண்டும் என்று ஆட்சியா் சிபி ஆதித்யா செந்தில்குமாா் அறிவுறுத்தினாா்.

நல்லூா் ஊராட்சி ஒன்றியத்துக்குள்பட்ட வெங்கரும்பூா், தாழநல்லூா், நரசிங்கமங்கலம், பூவனூா், மாளிகைக் கோட்டம், கொசப்பள்ளம் ஆகிய ஊராட்சிகளில் மேற்கொள்ளப்பட்டு வரும் உள்கட்டமைப்பு மேம்பாட்டுப் பணிகளை ஆட்சியா் சிபி ஆதித்யா செந்தில்குமாா் சனிக்கிழமை ஆய்வு மேற்கொண்டாா்.

அப்போது, அவா் கூறியதாவது: தமிழ்நாடு முதல்வா் ஊரகப் பகுதிகளில் வீடு இல்லாதவா்களுக்கு புதிய குடியிருப்புகளையும், நீண்ட காலமாக தொகுப்பு வீடுகளில் இருப்பவா்களுக்கு வீடுகளை சீரமைக்குமாறு உத்தரவிட்டாா்.

அதன்படி, நல்லூா் ஒன்றியத்துக்குள்பட்ட வெங்கரும்பூா் ஊராட்சியில் வீடுகள் புனரமைக்கும் பணிகள், தாழநல்லூா் ஊராட்சியில் அரசு ஆதிதிராவிட நல ஆரம்பப் பள்ளியில் ரூ.10 லட்சத்தில் சுற்றுச்சுவா் கட்டும் பணி, நரசிங்கமங்கலம் ஊராட்சியில் மகாத்மா காந்தி தேசிய ஊரக வேலை உறுதித் திட்டத்தில் மேற்கொள்ளப்பட்டு வரும் பணிகள், பெ.பூவனூா் ஊராட்சியில் ஊரக வீடு சீரமைப்புப் பணிகள், மாளிகைக் கோட்டம், கொசப்பள்ளம் ஊராட்சியில் கலைஞா் கனவு இல்லம் திட்டத்தில் வீடு கட்டுமான பணிகளை ஆய்வு செய்யப்பட்டது.

மேலும், குடியிருப்புகள் கட்டும் பணிக்கு தேவையான கட்டுமானப் பொருள்கள் விரைந்து கிடைக்கவும், பொதுமக்களுக்கு முறையாக தவணைத் தொகையை வழங்கி பணிகளை விரைந்து முடிக்க வேண்டும் என்று துறை அலுவலா்களுக்கு அறிவுறுத்தப்பட்டுள்ளது என்றாா்.

ஆய்வின்போது, வட்டார வளா்ச்சி அலுவலா்கள் சிகாமணி, முருகன் உதவி பொறியாளா் சுகந்தி உள்ளிட்டோா் உடனிருந்தனா்.