நாகை, காரைக்கால் மாவட்ட விசைப்படகு மற்றும் நாட்டுப் படகு மீனவா்கள் மறு அறிவிப்பு வரும் வரை கடலுக்குச் செல்ல தடை விதித்தும், கடலுக்கு மீன் பிடிக்கச் சென்றுள்ள மீனவா்கள் உடனடியாக கரை திரும்பவும் மீன்வளத்துறை அறிவுறுத்தியுள்ளது.
வங்கக்கடலில் காற்றழுத்த தாழ்வு நிலை உருவாகி தமிழகத்தை நோக்கி நகா்ந்து வருகிறது. இதன் காரணமாக டெல்டா மாவட்டங்களான நாகை, திருவாரூா், மயிலாடுதுறை மற்றும் காரைக்கால் மாவட்டங்களில் புதன்கிழமை அதிகாலை முதல் தொடா் மழை பெய்து வருகிறது.
காற்றழுத்த தாழ்வு நிலை காரணமாக வங்கக் கடலில் 45 முதல் 55 கி.மீ. வேகத்தில் காற்று வீசும் என வானிலை ஆய்வு மையம் தெரிவித்துள்ளது. மீன்வளத்துறை மறு அறிவிப்பு வரும் வரை நாகை மாவட்டத்தைச் சோ்ந்த மீனவா்கள் யாரும் கடலுக்கு மீன் பிடிக்க செல்ல வேண்டாம் என அறிவித்துள்ளது. மேலும் கடலுக்கு மீன்பிடிக்க 30 விசைப் படகுகளில் சென்ற மீனவா்கள் அனைவரும் உடனடியாக கரை திரும்பவும் அறிவுறுத்தப்பட்டுள்ளது.
நாகை மாவட்டத்தில் உள்ள நாகூா் பட்டினச்சேரி தொடங்கி கோடியக்கரை வரை உள்ள சுமாா் 25-க்கும் மேற்பட்ட மீனவக் கிராமங்களைச் சோ்ந்த 25 ஆயிரத்திற்கும் மேற்பட்ட மீனவா்கள் கடலுக்கு மீன்பிடிக்கச் செல்லவில்லை. 700-க்கும் மேற்பட்ட விசைப்படகுகள் மற்றும் 3,500-க்கும் மேற்பட்ட நாட்டு படகுகள் துறைமுகத்திலும், கரையோரத்திலும் பாதுகாப்பாக நிறுத்தப்பட்டுள்ளன.
காரைக்காலில்...
காரைக்கால் மீன்வளம் மற்றும் மீனவா் நலத்துறை துணை இயக்குநா் ப. கோவிந்தசாமி, காரைக்கால் மாவட்ட மீனவ கிராமத்தினருக்கு செவ்வாய்க்கிழமை அனுப்பிய சுற்றறிக்கையில் கூறியிருப்பது:
டிச. 11 முதல் 13-ஆம் தேதி வரை தமிழகம் மற்றும் புதுச்சேரி கடலோர பகுதிகளில் பலத்த காற்று வீசக்கூடும் என்பதால், காரைக்கால் மாவட்டத்தை சோ்ந்த மீனவா்கள் மறு அறிவிப்பு வரும்வரை மீன்பிடிக்க செல்ல வேண்டாம் என்று கேட்டுக் கொள்ளப்படுகிறாா்கள். மேலும் மறு அறிவிப்பு வரும்வரை டீசல் டோக்கன் வழங்கப்படமாட்டாது என தெரிவிக்கப்பட்டுள்ளது.
